Tarixi Zirvə görüşü: Bölgədə yeni mərhələ
Bakı, 25 avqust, AZƏRTAC
Avqustun 22-də Türkmənbaşı şəhərindəki “Avaza” milli turizm zonasında Azərbaycan Prezidenti İlham Əliyev, Türkmənistan Xalq Məsləhətinin sədri Qurbanqulu Berdiməhəmmədov və Özbəkistan Prezidenti Şavkat Mirziyoyev arasında yüksəksəviyyəli üçtərəfli görüş yekun bəyanatlar və geniş spektrli əməkdaşlığın, iqtisadi-ticari, nəqliyyat-kommunikasiya, enerji və humanitar sahələrdə əlaqələrin müzakirəsi ilə yadda qaldı.
Bəyanatlarda qardaş ölkələrin böyük tranzit potensialının tam şəkildə reallaşması üçün Avaza və Bakı limanlarında, həmçinin digər strateji limanlarda logistika infrastrukturunun inkişaf etdirilməsi, tarif siyasətinin uyğunlaşdırılması və rəqəmsallaşdırmanın tətbiqi məsələləri diqqət mərkəzində oldu. Eyni zamanda, üç ölkə arasında qarşılıqlı ticarətin həcminin son zamanlar iki dəfə artdığı vurğulandı.
Bu fikirləri AZƏRTAC-a açıqlamasında Milli Məclisin Ailə, qadın, uşaq məsələləri komitəsinin sədr müavini Jalə Əliyeva söyləyib.
Görüşdə Yaşıl enerji layihələrinin Avropaya yönəldilmiş ixrac perspektivlərinin və Xəzər dənizinin neft-qaz yataqlarında birgə geoloji axtarış-tədqiqat potensialının artırılması imkanlarının müzakirəsinin mühüm əhəmiyyət daşıdığını vurğulayan deputat turizm, təhsil, mədəniyyət və digər sahələr üzrə üçtərəfli proqramların hazırlanmasını, qarşılıqlı turist axınının artırılması ilə yanaşı, mədəni irsimizin təqdim olunmasını vacib istiqamətlər kimi dəyərləndirib. Görüş çərçivəsində imzalan sənədlərə diqqət çəkən J.Əliyeva onların gələcəkdə sözügedən istiqamətlərdə əməkdaşlığa mühüm töhfələr verəcəyini vurğulayıb.
Üç türkdilli dövlətin liderlərinin verdikləri mesajlara diqqət çəkən Milli Məclisin deputatı türkmən xalqının milli Lideri Qurbanqulu Berdiməhəmmədovun görüşü “tarixi əhəmiyyətli” adlandırdığını, siyasi, iqtisadi və mədəni əməkdaşlığın yeni mərhələyə qədəm qoyduğunu qeyd edib.
Bildirib ki, Özbəkistan Prezidenti Şavkat Mirziyoyev sülh və etimad ilində bu dialoqun regional sabitliyi dərinləşdirməyə xidmət etdiyini vurğuladı.
Türk dövlətləri arasında əlaqələrin möhkəmlənməsinin və dərinləşməsinin təşəbbüskarı və bayraqdarı olan Azərbaycan Prezidenti İlham Əliyev isə “qardaşlıq ənənələrinə sadiq” əlaqələrin yeni formatda davam etdiyini diqqətə çatdırdı. Eyni zamanda, Füzulidə inşası nəzərdə tutulan məscid və Zəngəzur dəhlizi kimi konkret əməkdaşlıq nümunələrini xatırlatdı, yeni üçtərəfli formatın formalaşdırılmasının anonsunu verdi.
“Bu üçtərəfli görüş Azərbaycanın, Türkmənistanın və Özbəkistanın regional inteqrasiyada daha fəal rol oynamağa hazır olduğunu nümayiş etdirdi. Orta Dəhliz və Zəngəzur dəhlizi kimi nəqliyyat arteriyaları vasitəsilə Avrasiyada dinamik, çoxşaxəli əməkdaşlıq modelinə doğru inamlı addım atıldı. Üç ölkə liderlərinin tarixi Zirvə görüşü və onun nəticələrinin konturlarını əhatə edən Strateji Yol xəritəsi bunu deməyə əsas verir ki, əldə edilən razılaşmalar institusional bazanın möhkəmlənməsinə yönəlib və gələcək əməkdaşlıq üçün mühüm zəmin yaradaraq bölgədə yeni mərhələnin başlanğıcına çevrilib”, - deyə parlamentari qeyd edib.
Bölmənin digər xəbərləri
