TBİLİSİDƏ XOCALI SOYQIRIMINA HƏSR OLUNMUŞ SİLSİLƏ TƏDBİRLƏR KEÇİRİLMİŞDİR
Tbilisi, 25 fevral (AZƏRTAC). Tbilisi şəhərində Xocalı soyqırımının 18-ci ildönümünə həsr olunmuş tədbir ulu öndər Heydər Əliyevin abidəsi önünə əklillər qoyulması ilə başlanmışdır.
Mərasimdə Azərbaycanın Gürcüstandakı səfiri Namiq Əliyev, ölkəmizin Gürcüstandakı iş adamları, yerli soydaşlarımızın nümayəndələri iştirak etmişlər.
Sonra azərbaycanlıların Tbilisidəki “Varlıq” mədəniyyət mərkəzində İslam Konfransı Təşkilatı (İKT) Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış “Xocalıya ədalət” kampaniyasının Gürcüstanda açılmış yeni veb-saytının təqdimatı keçirilmişdir.
Tədbiri “Varlıq” mədəniyyət mərkəzinin rəhbəri, şair Rafiq Hümbət açmışdır.
Azərbaycanın Gürcüstandakı səfiri Namiq Əliyev mərasim iştirakçılarına Xocalı soyqırımı barədə ətraflı məlumat vermişdir. Bildirmişdir ki, İKT Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış beynəlxalq kampaniya dünyanın bir çox ölkəsində özünə tərəfdar tapır və onların sayı get-gedə artır. Kampaniyadan məqsəd külli miqdarda imza toplamaqla Xocalı soyqırımına beynəlxalq səviyyədə siyasi və hüquqi qiymət verilməsi ilə əlaqədar BMT-nin baş katibinə, dünyanın aparıcı dövlətlərinin liderlərinə müraciət qəbul etməkdir.
Qeyd edilmişdir ki, ölkəmiz bir müddət informasiya blokadasında olduğundan Azərbaycanın başına gətirilmiş Xocalı müsibətinin dünya ictimaiyyətinə çatdırılması mümkün olmamışdır. Nəhayət, ümummilli liderimiz Heydər Əliyevin yenidən hakimiyyətə qayıdışı ilə informasiya blokadasının yarılmasına nail olunmuşdur.
Diplomat demişdir ki, Prezident İlham Əliyevin tarazlı siyasəti, Azərbaycan diplomatiyasının erməni riyakarlığına qarşı ardıcıl mübarizəsi getdikcə öz bəhrəsini verir və haqqın təntənəsinə tam əminlik yaradır. Heydər Əliyev Fondunun Xocalı soyqırımı, 20 Yanvar faciəsi və digər ədalətsizliklər barədə müxtəlif dillərdə hazırladığı kitablar, kinofilmlər, fotoalbomlar Azərbaycan həqiqətlərini etiraf etmək istəməyənləri artıq düşünməyə məcbur etmişdir. “Xocalıya ədalət” kampaniyasının Azərbaycan həqiqətlərini dünyaya yayacağına, erməni vəhşiliklərinin pərdəsini götürüb onların iç üzünü beynəlxalq ictimaiyyətə bəyan edəcəyinə tam əminik. Artıq bir neçə gün ərzində bu kampaniya Gürcüstanda özünə yüzlərlə tərəfdar tapmış və həmin hərəkata azərbaycanlılarla yanaşı, çoxsaylı gürcülərin də qoşulması ürəyimizcədir. Erməni separatizmi təkcə Azərbaycan deyil, bütövlükdə Cənubi Qafqaz bölgəsi üçün təhlükədir. Buna görə də həmin təhlükəyə qarşı birləşməliyik.
Səfir diqqətə çatdırmışdır ki, Ermənistanın indiki prezidenti və sabiq rəhbərləri də Xocalı qətliamının iştirakçılarıdırlar. Bu barədə əsaslı sübut-dəlillər mövcuddur. Azərbaycanlılar kimi, gürcü ictimaiyyətinin nümayəndələri də Xocalı soyqırımına siyasi və hüquqi qiymət verilməsini tələb edirlər.
“Gürcüstan” qəzetinin redaktoru Süleyman Süleymanov, ölkə parlamentinin deputatı Ramin Bayramov, Gürcüstan Milli Elmlər Akademiyasının prezidenti Vladimir Ramişvili, şair-tərcüməçi Zezva Medulaşvili, həkim Nizami Xəlilov və başqaları çıxış edərək Xocalı faciəsinin tezliklə bütün dünyada soyqırımı kimi qəbul olunacağına inandıqlarını bildirmişlər.
Tədbirdə Heydər Əliyev Fondunun dəstəyi ilə nəşr olunmuş Xocalı faciəsindən bəhs edən kitablar və fotoşəkillər nümayiş etdirilmişdir.
Sonra mərasim Azərbaycanın Gürcüstandakı iş adamlarının iştirakı və Heydər Əliyev Fondunun dəstəyi ilə İ.Cavaxişvili adına Tbilisi Dövlət Universitetində yaradılmış Azərbaycanın Dostları Klubunun auditoriyasında davam etdirilmişdir.
Səfir Namiq Əliyev Gürcüstanın azərbaycanlılar yaşayan əksər bölgələrində Xocalı soyqırımı ilə bağlı geniş tədbirlər keçirildiyini, bu mərasimlərə gürcü ictimaiyyətinin də fəal qoşulduğunu vurğulamış, Leyla xanım Əliyevanın təşəbbüsü ilə başlanmış kampaniyanın Gürcüstanda özünə çoxsaylı tərəfdarlar topladığını, gürcülərin bu hadisəni ürək ağrısı ilə qəbul etdiklərini demişdir. Səfir azərbaycanlı iş adamlarını bu kampaniyaya qoşulmağa çağırmış, əcnəbi biznes dairələrini erməni vəhşiliyinin iç üzü ilə tanış etməkdə, onlara Azərbaycan xalqının başına gətirilmiş müsibətlər barədə ətraflı məlumat verməkdə fəal olmalarını arzulamışdır.
Tarix elmləri doktoru, professor Quram Marxulia AZƏRTAC-ın xüsusi müxbiri ilə söhbət zamanı demişdir: “Bu, ağır faciədir. Erməni separatçıları keçmiş Sovet İttifaqının dəstəyi ilə Azərbaycanın Xocalı şəhərini yer üzündən silməyə nail olmuşlar. Təəssüf edirəm ki, ötən əsrin 90-cı illərində Gürcüstanın özünün də separatçı qüvvələrin hücumuna məruz qaldığı bir zamanda biz gürcü alimləri Xocalı faciəsi barədə ölkə ictimaiyyətinə ətraflı məlumat verə bilmədik. Qarabağa erməni təcavüzü başlayandan az sonra abxaz və osetin separatçıları da Gürcüstanda baş qaldırdılar. Bu səbəbdən də gürcü ictimaiyyətinin diqqəti başqa səmtə yönəldilmişdi. İndi isə vəziyyət dəyişmiş və gürcü ictimaiyyəti dost, qardaş Azərbaycanda baş vermiş hadisələrlə yaxından tanış olur, erməni hiyləgərliyi ilə törədilmiş faciələri ürək ağrısı ilə qeyd edir. Mən gürcü dilində həmin faciələrə həsr olunmuş monoqrafiya hazırlamışam və yaxın vaxtlarda işıq üzü görəcəkdir. Əminəm ki, həmin monoqrafiyanı oxuyan hər bir gürcü Azərbaycan həqiqətləri ilə yaxından tanış olacaqdır. Fikrimcə, Qafqaz xalqlarının erməni separatçılığına qarşı birləşməsinin vaxtı çatmışdır. Xocalı faciəsi Azərbaycan xalqına qarşı törədilmiş soyqırımıdır və dünyanın bütün dövlətləri buna hüquqi qiymət verməlidirlər”.
Tədbir Tbilisidəki Rustavelli adına teatrda Azərbaycan Dövlət simfonik orkestrinin Xocalı faciəsinə həsr olunmuş konserti ilə başa çatmışdır. Konsertdə Gürcüstan dövlətinin, parlamentinin, Tbilisidə akkreditə olunmuş diplomatik korpusun, Azərbaycan və gürcü ictimaiyyətinin nümayəndələri iştirak etmişlər.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
