Tehranda ümummilli lider Heydər Əliyevin xatirəsinə həsr olunan anım mərasimi keçirilib
Tehran, 10 dekabr, AZƏRTAC
Dekabrın 10-da Azərbaycanın İrandakı səfirliyində ulu öndər Heydər Əliyevin xatirəsinə həsr olunan anım mərəsimi keçirilib.
Ümummilli lider Heydər Əliyevin xatirəsi bir dəqiqəlik sükutla yad ediləndən sonra onun həyat və fəaliyyəti haqqında sənədli film nümayiş etdirilib.
Tədbirdə çıxış edən Azərbaycanın İrandakı səfiri Cavanşir Axundov bildirib ki, Heydər Əliyev 1969-cu ildə Azərbaycan Kommunist Partiyası Mərkəzi Komitəsinin birinci katibi seçilərək respublikanın rəhbəri oldu. Məhz bundan sonra SSRİ-nin tərkibində geridə qalmış respublikanı inkişaf etmiş diyara çevirdi. 1970-ci illərdə Azərbaycan özünün intibah dövrünə qədəm qoydu. Bu illər respublikada elmin, mədəniyyətin, səhiyyənin və ən başlıcası iqtisadiyyatın inkişaf dövrü oldu.
Bildirilib ki, Heydər Əliyevin idarəçilik qabiliyyəti mərkəzi hökumətin nəzərindən qaçmadı və o, SSRİ Nazirlər Soveti sədrinin birinci müavini vəzifəsinə təyin edildi. Həmin vəzifədə çalışdığı dövrdə Heydər Əliyev qlobal miqyaslı iqtisadi layihələrin həyata keçirilməsinə nail oldu ki, bu da SSRİ-də yaşayan xalqların rifah halının yüksəlməsinə səbəb oldu.
Sovet hakimiyyəti süquta uğradıqdan sonra yaranmış tarixi şəraitdən istifadə edən Azərbaycan müstəqilliyini bərpa etdi.
Qeyd edilib ki, Azərbaycan müstəqilliyinin ilk illərində xaos və anarxiyaya bürünmüşdü. Xalqın Qağlıq Qarabağın ermənilər tərəfindən işğalına etirazının dalğası üzərində hakimiyyətə gələnlər ölkəni idarə edə bilmədilər, əksinə iqtisadiyyatı dağıtdılar, qonşu dövlətlərlə münasibətləri korladılar.
Həmin dövrdə xalq Naxçıvanda yaşayan Heydər Əliyevin təkidlə hakimiyyətə qayıtmasını tələb etdi. Xalqın tələbinə və Azərbaycanın dağılmasına biganə yanaşa bilməyən Heydər Əliyev yenidən hakimiyyətə qayıdaraq ölkədə ictimai-siyasi sabitliyi bərpa etdi. Dağılmış Azərbaycan iqtisadiyyatını bərpa etmək məqsədi ilə xarici investorları ölkəyə cəlb etdi və dirçəlişin əsasını yaratdı.
Səfir deyib ki, Heydər Əliyev müstəqilliyini yeni bərpa etmiş Azərbaycanın dünyanın siyasi xəritəsindən silinməsinin qarşısını alaraq onun suverenliyini qoruya bildi. Bu, heç də asan başa gəlmədi. Təxribatlar və həyatına edilən sui-qəsdlərdən çəkinməyərək Heydər Əliyev güclü siyasi iradəsi ilə Azərbaycanı müstəqil dövlət kimi dünya birliyinin tamhüquqlu subyektinə çevirdi.
Qonşu dövlətlərlə, xüsusilə İranla münasibətlərə böyük önəm verən Ümummilli Lider rəsmi Tehranla iqtisadi, ticarət, mədəniyyət əlaqələrinin inkişafının əsasını qoydu. Bu gün məhz Heydər Əliyev siyasi kursunu uğurla davam etdirən Prezident İlham Əliyev İran ilə Azərbaycan arasındakı əlaqələrin daha da yaxınlaşmasına və hər iki xalqın dostluq şəraitində yaşamasına nail olub.
C.Axundov deyib ki, cari il Azərbaycan Prezidenti İlham Əliyev və İran Prezidenti Həsən Ruhani dörd dəfə görüşüblər. Prezidentlərin qarşılıqlı rəsmi səfərlərinin faydalı keçdiyini bildirən səfir diqqətə çatdırıb ki, hər iki dövlət başçısının siyasi iradə nümayiş etdirərək əlaqələri genişləndirmək istəkləri xalqların mehriban qonşuluq şəraitində yaşamasına xidmət edir.
Sonra İranın Azərbaycandakı keçmiş səfiri Əhəd Qəzai, Azərbaycanın Dini Qurumlarla İş üzə Dövlət Komitəsi sədrinin birinci müavini Səyyad Salahlı, Qafqaz Müsəlmanları İdarəsinin İrandakı nümayəndəsi Şamil Rəsulov və başqaları çıxış edərək ulu öndər Heydər Əliyevin dövlətçilik təcrübəsindən və Azərbaycan xalqı qarşısındakı xidmətlərindən danışıblar.
Tədbirdə İranın Xarici İşlər Nazirliyinin əməkdaşları, Tehranda təhsil alan azərbaycanlı tələbələr, ictimaiyyətin nümayəndələri və ziyalılar iştirak ediblər.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
