Azərbaycan şahmatının lideri, beynəlxalq qrossmeyster Teymur Rəcəbov Liviyanın paytaxtı Tripolidə kişilər arasında dünya çempionatında üçüncü yeri tutaraq, bürünc medala layiq görülmüşdür. Bu, Azərbaycanın müstəqilliyi illərində şahmat sahəsində qazanılmış ən yüksək nailiyyətdir. Teymur Rəcəbov 128 şahmatçının iştirak etdiyi yarışda yalnız dünya çempionu, Özbəkistan idmançısı Rüstəm Qasımcanovdan və ikinci yeri tutan ingiltərəli Maykl Adamsdan geri qalmışdır.

Yekun nəticədən bir qədər təəssüflənsə də, Teymur Rəcəbov üçüncü yeri tutmasını böyük nailiyyət, eyni zamanda, dünya şahmat tacını Bakıya qaytarmaq arzusunun gerçəkləşməsinə doğru daha bir addım kimi qiymətləndirmişdir.