“Toyota” konserni bu il 10,6 milyon avtomobil istehsal etməyi planlaşdırır
Bakı, 16 yanvar, AZƏRTAC
Yaponiyanın “Toyota Motor” avtomobil konserni 2023-cü ildə 10,6 milyona qədər avtomobil istehsal edə bilər.
AZƏRTAC xarici mediaya istinadla xəbər verir ki, bu, pandemiyadan əvvəl - 2019-cu ildə qeydə alınan (9,1 milyon avtomobil) göstəricini üstələyəcək.
Optimist proqnoz avtomobil hissələrinin tədarük zəncirlərində vəziyyətin yaxşılaşması ilə bağlıdır. Konsern 2022-ci ilin əvvəlindən noyabrın sonunadək ümumilikdə 8,3 milyon ədəd “Toyota” və “Lexus” avtomobili istehsal edib.
Eyni zamanda, konsernin satınalmalar üzrə direktoru Kadzunari Kumakura bildirib ki, yarımkeçiricilər çatışmazlığı aradan qalxmasa, plan 10 faiz kəsirdə qala bilər.
Yanvarın 16-da Tokioda keçirilən hərracda “Toyota” konserninin səhmləri 0,1 faiz bahalaşıb. Ötən il ərzində isə kompaniyanın kapitallaşması 25 faiz azalıb.
Bölmənin digər xəbərləri
