Türkiyə Ermənistanla sərhədə yaxın vilayətlərdə radiasiya təhlükəsinə qarşı monitorinq aparır
Ankara, 24 yanvar (AZƏRTAC). Türkiyənin Ermənistan ilə sərhədə yaxın 6 vilayətində bu ölkənin Metsamor Atom Elektrik Stansiyasından radiasiya sızıntısı iddiası ilə bağlı İğdır, Ağrı, Muş, Tunceli, Hakkari və Şınak vilayətlərində monitorinq başlanmışdır.
Türkiyənin iki müvafiq elm mərkəzi İğdırda aparacaqları monitorinqdə son illər geniş yayılmış xərçəng xəstəliyinin səbəblərinin müəyyən edilməsini planlaşdırır. Radiasiya səviyyəsinin ölçülməsi üçün şəhərin müxtəlif yerlərində cihazlar yerləşdirilmişdir. Mütəxəssislər 60 gün davam edəcək monitorinq zamanı su və torpaq nümunələrinin analizi və meteoroloji müşahidələr aparacaqdır.
Monitorinq qrupunun üzvü, professor Mikdat Kadıoğlu bildirmişdir ki, ermənilər radiasiya səviyyəsinin yüksəlməsinin Metsamor AES-in fəaliyyəti ilə bağlı olduğunu inkar etsələr də, analizlər real vəziyyəti ortaya çıxaracaqdır. Monitorinqdə hava axınının izlənilməsi və müvafiq analizlər çox mühümdür. Çernobılda da radiasiyanın mənşəyi bu yolla ölçülmüşdü.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
