TÜRKİYƏ PREZİDENTİ ABDULLAH GÜLƏ BAKI DÖVLƏT UNİVERSİTETİNİN FƏXRİ DOKTORU ADI VERİLMİŞDİR
AZƏRTAC xəbər verir ki, noyabrın 7-də Türkiyə Prezidenti Abdullah Gülə Bakı Dövlət Universitetinin fəxri doktoru adı verilməsi münasibətilə BDU-da mərasim keçirilmişdir.
Universitetdə Türkiyə Prezidentini və onun xanımını səmimiyyətlə qarşıladılar. Tələbələr ali qonağa və xanımına tər çiçəklər təqdim etdilər.
Türkiyə dövlətinin başçısı əvvəlcə universitetdə fəaliyyət göstərən Heydər Əliyev Muzeyinin eksponatları ilə tanış oldu, Fəxri qonaqlar kitabına ürək sözlərini yazdı.
BDU-nun rektoru, AMEA-nın akademiki, Milli Məclisin deputatı
Abel Məhərrəmov mərasimi açaraq, Türkiyə Prezidenti Abdullah Gülün həyat və fəaliyyətinin əsas mərhələləri barədə danışdı. Ali qonağa müsəlman Şərqində ilk dünyəvi ali təhsil müəssisəsi olan Bakı Dövlət Universitetinin yaradılması tarixi barədə məlumat verildi. Bildirildi ki, hazırda bu ali məktəbin 16 fakültəsində 18 mindən çox tələbə təhsil alır. Təqribən 1300 tələbə 20 xarici ölkəni, o cümlədən 900 tələbə Türkiyəni təmsil edir. Universitetdə 1300-dən artıq müəllim işləyir. Onlardan təqribən 300 nəfəri elmlər doktoru, professor, 14-ü Milli Məclisin deputatıdır.
Rektor universitetin geniş beynəlxalq əlaqələrindən də söhbət açdı, Türkiyə Prezidentindən BDU-nun diplomlarının Türkiyədə tanınmasına yardım göstərməsini xahiş etdi.
Sonra Abel Məhərrəmov dünyada sabitliyin qorunub-saxlanması üçün səylərinə, Azərbaycan-Türkiyə qardaşlıq əlaqələrinin möhkəmlənməsində böyük roluna, elmi və tərəqqini dəstəkləməsinə görə Türkiyə Prezidentinə BDU-nun fəxri doktoru adı verilməsi barədə universitetin Böyük Elmi şurasının qərarını oxudu.
Türkiyə dövlətinin başçısına BDU-nun fəxri doktoru mantiyası, diplom və hədiyyə - onun rəssam tərəfindən çəkilmiş portreti təqdim olundu.
Türkiyə Prezidenti tələbələrin suallarına cavab verdi, sonra mərasimdə çıxış etdi. O, bu şərəfə layiq görüldüyü üçün Azərbaycanın qocaman ali məktəbinin Elmi şurasının üzvlərinə təşəkkürünü bildirdi. Abdullah Gül Türkiyə Prezidenti vəzifəsində ilk rəsmi səfərini Azərbaycana etdiyini bildirərək dedi ki, bu fakt ölkələrimiz arasında qardaşlıq münasibətlərinin və qarşılıqlı dəstəyin yüksək səviyyədə olmasını təsdiq edir. Abdullah Gül ulu öndərlər Mustafa Kamal Atatürkün və Heydər Əliyevin kəlamlarını xatırlatdı: Türkiyə Respublikasının banisi iki xalqın tarixi yaxınlığını səciyyələndirərək deyirdi ki, “Azərbaycanın kədəri bizim kədərimiz, Azərbaycanın sevinci bizim sevincimizdir”. Azərbaycan-Türkiyə əlaqələrinin inkişafına misilsiz töhfələr vermiş ümummilli lider Heydər Əliyev isə deyirdi: “Biz bir millət, iki dövlətik”. Bizim birliyimiz bundan yaxşı ifadə edilə bilməzdi.
Ali qonaq dedi ki, Azərbaycanın müstəqil dövlət kimi mövcud olduğu illərdə iki ölkə arasında siyasi, iqtisadi və humanitar əlaqələr sürətlə inkişaf etmiş, münasibətlər strateji tərəfdaşlıq səviyyəsinə çatmışdır. Azərbaycanın təşəbbüsü ilə həyata keçirilmiş Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri kimi qlobal energetika layihələri, Bakı-Tbilisi-Qars nəqliyyat layihəsi ilk növbədə Azərbaycan və Türkiyənin möhkəm alyansı sayəsində mümkün olmuşdur.
Türkiyə Prezidenti ölkəmizin əsas problemi olan Ermənistan-Azərbaycan, Dağlıq Qarabağ münaqişəsinin həlli məsələsindən danışaraq bildirdi ki, ermənilərin mənfur əməlləri barədə həqiqəti dünya ictimaiyyətinə çatdırmaq üçün alimlərin, jurnalistlərin, tarixçilərin, Azərbaycanın qeyri-hökumət təşkilatlarının səylərini fəallaşdırmaları zəruridir.
Mərasim başa çatandan sonra Prezident Abdullah Gül BDU-da təhsil alan türkiyəli tələbələrlə görüşdü.
Bölmənin digər xəbərləri
