Türkiyə Prezidenti Azərbaycan ilə Ermənistan arasında sülh danışıqlarının əhəmiyyətini Paşinyana çatdırıb
Ankara, 5 iyun, AZƏRTAC
Türkiyə Prezidenti Rəcəb Tayyib Ərdoğan iyunun 5-də Ermənistanın baş naziri Nikol Paşinyanla telefon danışığı aparıb.
AZƏRTAC Türkiyə Prezident Administrasiyasının Kommunikasiya idarəsinə istinadla xəbər verir ki, erməni tərəfinin təşəbbüsü ilə baş tutan söhbət zamanı N. Paşinyan Türkiyə Prezidentini və xalqını qarşıdan gələn Qurban bayramı münasibətilə təbrik edib.
Tərəflər iki ölkə arasında münasibətlərə dair fikir mübadiləsi aparıb, regional və qlobal məsələləri müzakirə ediblər.
Türkiyə Prezidenti Azərbaycan ilə Ermənistan arasında sülh danışıqlarının və regionda münasibətlərin hərtərəfli normallaşmasının əhəmiyyətini vurğulayıb. O, Ankara ilə İrəvanın təmasları ilə bağlı məmnunluğunu ifadə edib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
