Türkiyədə Xocalı soyqırımının 20-ci ildönümü ilə əlaqədar tədbirlər davam edir
Ankara, 25 fevral (AZƏRTAC). Türkiyənin müxtəlif şəhərlərində Xocalı soyqırImının 20-ci ildönümü ilə əlaqədar anma tədbirləri və konfranslar davam edir.
Türkiyə paytaxtındakı Orta Doğu Texniki Universitetində Azərbaycanın Türkiyədəki səfirliyinin təşkilatçılığı ilə Xocalı soyqırımına həsr olunmuş konfrans keçirilmişdir.
Konfransda Milli Məclisin deputatı Qənirə Paşayeva, professorlar Hamid Bağçı və Hamidulla Mehrabov çıxış edərək, Azərbaycanda, Anadolu torpaqlarında ermənilər tərəfindən törədilmiş qətliamlardan bəhs etmiş, bu faciələrin dünya ictimaiyyətinə anladılması üçün gənclərin üzərinə böyük vəzifələr düşdüyünü vurğulamışlar.
Konfransda tələbələrin hazırladıqları və Xocalı faciəsindən bəhs edən tamaşa təqdim olunmuş, “Xocalıya ədalət” kampaniyası çərçivəsində imza toplanmışdır.
Ankarada digər tədbir Türkiyə-Azərbaycan Dərnəyinin (TAD) Türk Araşdırmalar Mərkəzində (TÜRKSAM) təşkil etdiyi konfrans olmuşdur.
Konfransda çıxış edən TÜRKSAM-ın sədri, millət vəkili Sinan Oğan Xocalı soyqırımı ilə bağlı Türkiyə Böyük Millət Məclisində görülən işlərdən ətraflı bəhs etmiş, parlamentin xarici əlaqələr komissiyası və Türkiyə-Azərbaycan parlamentlərarası dostluq qrupunda müvafiq bəyanatların qəbul olunduğunu diqqətə çatdırmışdır. S.Oğan demişdir ki, Xocalı soyqırımı ilə bağlı məsələ parlamentin fevralın 28-də keçiriləcək plenar iclasında da müzakirə olunacaqdır.
Türkiyədəki iyirmi qeyri-hökumət təşkilatının imzaladığı və Xocalı qətliamını soyqırımı kimi qəbul edən bəyanat mətbuata açıqlanmışdır.
X X X
İzmir. Xocalı soyqırımı qurbanlarının xatirəsi “Petkim” şirkətinin konfrans zalında keçirilmiş mərasimdə də anılmışdır.
Türkiyənin Giresun Universitetinin professoru Aygün Attar, “Petkim”in baş direktoru Hayati Öztürk, siyasi partiyaların İzmirin Aliağa rayonu təşkilatlarının sədrləri çıxış edərək Xocalı qətliamından bəhs etmiş, bu faciənin bütün türk millətinin qan yaddaşına həkk olunduğunu vurğulamışlar.
Mərasim iştirakçıları Heydər Əliyev Fondunun təqdim etdiyi “Xocalı qətliamı” sənədli filminə baxmış, foyedə təşkil olunmuş foto və rəsm sərgisi ilə tanış olmuşlar.
İzmirdə Xocalı faciəsinin 20-ci ildönümünə həsr olunmuş digər mərasim Balkan, Azərbaycan və Krım dərnəklərinin iştirakı ilə keçirilmişdir.
Mərasimdə Xocalı qətliamının canlı şahidləri Sevda Kərimova, Nurlanə Hümbətova, Həsrət Xəlilova və Sənəm Abdullayeva 1992-ci il fevralın 25-dən 26-na keçən dəhşətli gecədə baş verənlərdən bəhs etmişlər.
Göz yaşları ilə onları dinləyən izmirlilər Xocalı qadınlarına çiçəklər təqdim etmişlər.
X X X
Camlıdere. Türkiyənin hakim Ədalət və İnkişaf Partiyasının Camlıdere şəhərində keçirilmiş toplantısında partiyanın baş katibi, millət vəkili Haluk İpək Xocalı soyqırımından bəhs etmişdir. Onun sözlərinə görə, Türkiyə həmin illərdə indiki kimi güclü olsaydı, dost və qardaş ölkədə bu faciə baş verməzdi. Buna kimsənin cürəti çatmazdı.
Partiyanın digər məsul şəxsləri də Xocalı qətliamından bəhs etmiş, Türkiyənin hər zaman qardaş Azərbaycanın yanında olduğunu vurğulamışlar.
X X X
Sivas. Bu şəhərdəki Sənaye və Ticarət Palatasında “İnsanlıq dramı: Xocalı qətliamı” mövzusunda konfrans keçirilmişdir.
Konfransda Türkiyə parlamentinin deputatı Atilla Kaya və Sivasın Cümhuriyyət Universitetinin dekanı, professor Ayxan Öztürk çıxış edərək Xocalı soyqırımı və Qarabağın digər bölgələrində ermənilərin törətdikləri qətliamlardan bəhs etmişlər. Natiqlər bildirmişlər ki, etnik mənsubiyyətinə görə dinc insanların qətlə yetirilməsi və bir şəhərin yer üzündən silinməsi soyqırımıdır. Türkiyə və Azərbaycanın millət vəkilləri, qeyri-hökumət təşkilatları bu soyqırımın dünya parlamentlərində tanınması üçün səylərini gücləndirməlidirlər.
X X X
Nevşehir. Xocalı soyqırımı qurbanlarının xatirəsi Nevşehir Universitetində keçirilən konfransda da anılmışdır.
Universitetin dosenti, azərbaycanlı Pərvanə Bayram ermənilərin iki əsrə yaxın bir zamanda Azərbaycan və Anadolu torpaqlarında törətdikləri qətliamlardan bəhs etmiş, Xocalı faciəsinin bütün dünyada tanınması üçün müasir təbliğat vasitələri, xüsusilə sosial şəbəkələrin imkanlarından istifadə edilməsinin zəruriliyini vurğulamışdır.
Konfransda Heydər Əliyev Fondunun təqdim etdiyi “Xocalı qətliamı” sənədli filmi nümayiş etdirilmiş, foto və rəsm sərgisi təşkil olunmuşdur.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
