Ukraynada Qanlı Yanvara həsr olunan mühazirə keçirilib
Kiyev, 21 yanvar, AZƏRTAC
Dnepr Milli Texniki Universitetindəki Ukrayna-Azərbaycan Mədəniyyət-Biznes Mərkəzində “Bakıda 1990-cı ilin Qara Yanvarı. Sovet İttifaqının repressiv maşınına qarşı azadlıq və ədalət” adlı onlayn mühazirə keçirilib.
AZƏRTAC xəbər verir ki, mühazirəni tarix üzrə fəlsəfə doktoru, Milli Azərbaycan Tarixi Muzeyinin icraçı direktoru Fərhad Cabbarov deyib. Tədbirin təşəbbüskarı Ukrayna-Azərbaycan layihələrinin kuratoru Marına Qonçaruk olub.
Tədbiri Ukrayna-Azərbaycan Mədəniyyət-Biznes Mərkəzinin direktoru Qennadi Onişenko açaraq, Ukraynaya dost olan Azərbaycan haqqında etibarlı və obyektiv məlumatları bilmək istəyən ukraynalı tələbələrə tarixi həqiqətlərin çatdırılmasının vacibliyindən danışıb. Mərkəzin direktoru Ukraynaya verdiyi dəstəyə görə Azərbaycan xalqına təşəkkür edib.
“1990-cı ilin 20 Yanvar hadisələri şübhəsiz ki, Azərbaycan xalqı üçün dəhşətli faciədir. Lakin biz həm də bu faciəni qəhrəmanlıq səhifəsi kimi dəyərləndiririk. Həmin gün həlak olanlar müstəqilliyə qovuşmaq yolunda ilk qurbanlar idi. Ona görə də 20 Yanvar şəhidlərinin xatirəsi xalqımız üçün xüsusilə əzizdir. Bu gün biz qardaş Ukrayna xalqı ilə ölkəsinin ərazi bütövlüyü, işğala qarşı mübarizəsində həmrəyik. Azərbaycan üçün bu, çox vacib məsələdir, çünki biz də 30 il ərzində bu problemlə üzləşmişdik. Lakin 2020-ci ildə Azərbaycan öz torpaqlarının bütövlüyünü, tarixi ədaləti bərpa etdi. Əminəm ki, Ukraynanın qəhrəman xalqı da tezliklə qələbə qazanacaq”, - deyə F.Cabbarov bildirib.
Tədbirin moderatoru Marına Qonçaruk Azərbaycanın İkinci Qarabağ müharibəsində Qələbəsinin əhəmiyyətindən danışıb. Bildirib ki, bu, postsovet məkanında işğaldan əziyyət çəkən ölkənin ərazi bütövlüyünün bərpası ilə bağlı ilk presedent olub. “20 Yanvar şəhidləri təkcə Azərbaycan üçün deyil, biz ukraynalılar üçün də qəhrəmandırlar. Çünki azərbaycanlılar Sovet İttifaqının repressiya maşınından qorxmadıqlarını göstəriblər. Azərbaycanlıların şücaəti sovet rejiminin sonunu və ölkələrimizin dövlət müstəqilliyinin bərpasını yaxınlaşdırdı”, - deyə M.Qonçaruk qeyd edib.
Sonra tələbələr və müəllimlərin sualları cavablandırılıb.
Tədbirdə Dnepr Milli Texniki Universitetinin kafedra müdiri Marina Paşkeviç, Kiyev Milli Dilçilik Universitetinin Heydər Əliyev adına Azərbaycan Dili və Mədəniyyəti Mərkəzinin direktoru İntiqam Şıxızadə, Dnepr Milli Texniki Universitetinin, eləcə də digər universitetlərin müəllim və tələbələri iştirak ediblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
