Ulu Öndər Heydər Əliyev gənc nəslin fiziki inkişafına xüsusi önəm verirdi
Bakı, 28 aprel, AZƏRTAC
“Heydər Əliyev İli” ilə əlaqədar olaraq Naxçıvan Muxtar Respublikası Gənclər və İdman Nazirliyinin kollektivinin iştirakı ilə “Heydər Əliyev və Azərbaycan idmanı” mövzusunda tədbir keçirilib.
Bu barədə AZƏRTAC-a Naxçıvan Muxtar Respublikası Gənclər və İdman Nazirliyinin mətbuat xidmətindən məlumat verilib.
Naxçıvan Muxtar Respublikası gənclər və idman naziri Ramil Hacı xalqımızın qəlbində daim yaşayan böyük dövlət xadimi Ulu Öndər Heydər Əliyevin siyasi hakimiyyətinin bütün dövrlərində Azərbaycanın mənafeyi uğrunda mübarizə apardığını xatırladaraq, dahi şəxsiyyətin xilaskarlıq və dirçəliş missiyası ilə bağlı fikirlərini bölüşüb. Ümummilli Liderin idmana olan qayğısından bəhs edən nazir vurğulayıb ki, Heydər Əliyev SSRİ dövrü daxil olmaqla, hər zaman Azərbaycan əhalisinin, əsasən də gənc nəslin fiziki və əqli inkişafına xüsusi önəm verib, bədən tərbiyəsi və idmanın ölkəmizdə əsas strateji sahələrdən birinə çevrilməsinə nail olub.
Ulu Öndər Azərbaycan rəhbərliyinə ikinci dəfə gəldikdən sonra ölkədə idmana münasibət tamamilə dəyişdi. Ölkəmizdə idmanın kütləviliyinə nail olmaq, bədən tərbiyəsi və idmanı geniş coğrafi məkanda inkişaf və təbliğ etdirmək, yüksək nailiyyətlər əldə etmək və dünyaşöhrətli idmançılar hazırlamaq üçün bu sahədə birbaşa məşğul olan qurumlar qarşısında konkret vəzifələr qoydu. İdmanın inkişafı ilə bağlı normativ hüquqi aktlar qəbul olundu, yeni inkişaf strategiyası tətbiq edildi, idmançılara dövlət dəstəyi artırıldı, idmanın maddi-texniki bazası genişləndirildi, beynəlxalq arenada böyük idman nailiyyətləri əldə olundu. Həmin dövrlərdə atılmış möhkəm təməllər və Prezident İlham Əliyevin səyləri sayəsində bu gün Azərbaycan dünyanın idman mərkəzlərindən birinə çevrilib, yüksək nailiyyətlər qazanılıb, dünya səviyyəsində tanınan, rəğbət bəslənilən idmançılarımızın sayı artıb.
Ramil Hacı qeyd edib ki, ölkəmizdə həyata keçirilən idman siyasətinin uğurlu icrası Naxçıvan Muxtar Respublikasını da əsaslı şəkildə əhatə edir. Bunun nəticəsidir ki, on minlərlə uşaq və gəncin idmanla məşğul olması üçün əlverişli şərait mövcuddur. Dövlət xətti ilə gənclərin sağlam həyat tərzinə cəlbi, maddi-texniki bazanın gücləndirilməsi, peşəkar idmançıların hazırlanması, ümumilikdə bədən tərbiyəsi və idmanın inkişafı istiqamətində əməli addımlar atılır, yeni nailiyyətlər qazanılır. Nazir əlavə edib ki, “Heydər Əliyev İli” ilə əlaqədar istər Naxçıvan şəhəri, istərsə də rayonlarda gənc nəsil nümayəndələrinin iştirakı ilə bağlı müxtəlif tədbirlər keçirilir, Ümummilli Liderin xatirəsinə həsr olunmuş idman yarışları təşkil olunur.
İstedadlı gənc şahmatçı, FIDE ustası Nəsrin Babayeva Ümummilli Lider Heydər Əliyevin idmançılara göstərdiyi qayğı barədə danışıb.
Çıxışların ardınca tədbir iştirakçıları muzeyin ekspozisiyası ilə yaxından tanış olublar.
Bölmənin digər xəbərləri
