Ümummilli lider Heydər Əliyev öz xalqına, dövlətinə və torpağına sadiq şəxsiyyət idi
Bakı, 11 dekabr, AZƏRTAC
Azərbaycan Ağsaqqallar Şurasında ümummilli lider Heydər Əliyevin anım günü münasibətilə yığıncaq keçirilib.
Ağsaqqallar Şurasının mətbuat xidmətindən AZƏRTAC-a bildiriblər ki, tədbir iştirakçıları şuranın sədri Fəttah Heydərov başda olmaqla əvvəlcə Fəxri xiyabanda ulu öndər Heydər Əliyevin məzarını ziyarət ediblər.
“Kempinski Badamdar” otelinin konfrans zalında davam edən tədbirdə Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə, Azərbaycan Respublikası Dövlət Neft Şirkətinin (ARDNŞ) birinci vitse-prezidenti, akademik Xoşbəxt Yusifzadə, Azərbaycan Tibb Universitetinin rektoru, Milli Məclisin deputatı, akademik Əhliman Əmiraslanov və digər rəsmi şəxslər iştirak ediblər.
Tədbirdə çıxış edən Azərbaycan Ağsaqqallar Şurasının sədri, Milli Məclisin deputatı Fəttah Heydərov bildirib ki, ümummilli lider Heydər Əliyev hakimiyyətə gəldiyi andan etibarən ölkəmizin parçalanmasının qarşısını aldı və bütün dünyaya xalqımızın birliyini nümayiş etdirdi. Fəttah Heydərov sözünə davam edərək deyib: “Ümummilli lider Heydər Əliyev öz xalqına, dövlətinə və torpağına sadiq şəxsiyyət idi. Ulu Öndərsiz illər çox faciəli olub. Ölkəmiz minlərlə şəhid verib. Həmin illərdə 30 minə yaxın insan əlil vəziyyətinə salınıb. Məhz dövlətimizin qayğısı və diqqəti sayəsində əlillərin problemləri öz həllini tapmaqdadır. Ulu Öndərin hakimiyyətdə olmadığı illərdə Azərbaycan ərazilərinin 20 faizi erməni silahlı qüvvələri tərəfindən işğal edilib və 1 milyondan artıq qaçqın və məcburi köçkün öz doğma yurd-yuvasından didərgin düşüb. Məhz ümummilli lider Heydər Əliyevin Azərbaycanda hakimiyyətə qayıdışından sonra xalqımız bu bəlalardan qurtardı və ölkəni işıqlı gələcəyə aparan möhkəm siyasətin əsasını qoyuldu. Bu gün Ulu Öndərin layiqli davamçısı Prezident İlham Əliyev Ümummilli Liderin müdrik siyasətini uğurla davam etdirir. Əsası ulu öndər Heydər Əliyev tərəfindən qoyulan bu siyasət nəticəsində Azərbaycan dünyanın sayılıb-seçilən, hər kəsin hesablaşmağa məcbur olduğu dövlətə çevrilib”.
Daha sonra çıxış edən Qafqaz Müsəlmanları İdarəsinin sədri, şeyxülislam Allahşükür Paşazadə vurğulayıb ki, ulu öndər Heydər Əliyev daim xalqının və dövlətinin yanında olub. Ümummilli Lider Azərbaycanın yeni tarixini yazdı, yaratdı və bu tarix yaşamaqdadır. Dahi şəxsiyyət ictimai-siyasi həyatın bütün sahələrini fəth etdi, eləcə də din-dövlət münasibətlərinin qurulmasına əsaslı zəmin yaratdı. Ulu Öndər Azərbaycanı milli, vətəndaş qırğınlarından, eyni zamanda, ölkəmizi parçalanmaqdan xilas etdi. Dahi şəxsiyyət cismən bizlə olmasa da, amma ruhən hər zaman yanımızdadır.
ARDNŞ-nin birinci vitse-prezidenti, akademik Xoşbəxt Yusifzadə bildirib ki, ümummilli lider Heydər Əliyev ilə ilk dəfə 1968-ci ildə Qum adasında Moskvadan gələn nümayəndə heyətinin tərkibində olarkən tanış olmuşdum. Bu dahi şəxsiyyət Azərbaycana rəhbərlik etməyə başladıqdan sonra neft sənayesindəki geriliyin cəbəblərini təhlil etdi. 70-ci illərdə neft sənayesinin inkişafını sahmana salmaq üçün plenum çağırdı. Ulu Öndər hakimiyyətə gələnə qədər dənizdən hasil edilən neft cəmi 40 metr dərinlikdən çıxarılırdı. Daha sonra neft sənayesinin inkişafı üçün ulu öndər Heydər Əliyev Bakı Dərin Özüllər Zavodunun tikintisinə nail oldu. Bu kimi islahatçı addımlardan sonra respublikamızda neft sənayesi dirçəlməyə başladı. Ulu öndər Heydər Əliyev ikinci dəfə Azərbaycana rəhbərlik etməyə başlayanda da neft sənayesi acınacaqlı vəziyyətdə idi. Dahi rəhbər birinci hakimiyyəti hakimiyyəti illərində olduğu kimi, yenə də neft sənayesindəki vəziyyəti təhlil edərək çıxış yolu tapdı. Neftin hasil olunması üçün xarici şirkətləri Azərbaycana dəvət etdi. Neft kəmərlərinin inşasına başlanıldı. Bundan sonra ölkəmizdə neft sənayesi dirçəlməyə başladı və bugünkü inkişaf səviyyəsinə çatdı.
Bölmənin digər xəbərləri
