Uydurma “1915-ci il erməni soyqırımından” Xocalı faciəsinədək:100 ilin yalanları və faciələri
Bakı, 23 aprel, Əsəd Məmmədov, AZƏRTAC
Aprelin 23-də “Uydurma “1915-ci il erməni soyqırımından” Xocalı faciəsinədək: 100 ilin yalanları və faciələri” mövzusunda konfrans keçirilib. Yeni Azərbaycan Partiyasının və Azərbaycan Milli Elmlər Akademiyasının Tarix İnstitutunun birgə təşkilatçılığı ilə keçirilən tədbirdə Milli Məclisin deputatları, azərbaycanlı və türkiyəli tarixçi alimlər iştirak ediblər.
YAP icra katibinin müavini, Dini Qurumlarla İş üzrə Dövlət Komitəsinin sədri Mübariz Qurbanlı tədbirin əhəmiyyətindən danışıb. Bildirib ki, ermənilər artıq neçə illərdir “qondarma soyqırımı” haqqında dünyaya yalan məlumatlar yayırlar. Bu məlumatlar heç bir tarixi sənədə əsaslanmır və heç vaxt həqiqət kimi qəbul edilə bilməz. Bu gün dünya özü də ermənilərin bu yalanlarını açıq şəkildə görür.
Erməni yalanlarının yayılmasının qarşısının alınması və ifşa olunması üçün həm Azərbaycan, həm də Türkiyədə mühüm işlərin görüldüyünü deyən M.Qurbanlı bu məsələdə ulu öndər Heydər Əliyevin xidmətlərini xatırlatdı. Bildirdi ki, Ümummilli Lider əsl həqiqətlərin aşkara çıxarılması məqsədi ilə “Azərbaycanlıların soyqırımı haqqında” 26 mart 1998-ci il tarixli Fərman imzalayıb. Azərbaycanlı alimlər ermənilərin həmvətənlərimizə qarşı törətdikləri soyqırımının ifşa olunması istiqamətində bir çox araşdırmalar aparıblar. Alimlərimizin apardıqları araşdırmalar nəticəsində bütün dünyaya məlum oldu ki, guya “soyqırımı”na məruz qaldıqlarını iddia edən ermənilər əslində azərbaycanlılara qarşı ötən əsrdə dəfələrlə amansız soyqırımları törədiblər, xalqımızın əmlakını talan ediblər. Ermənilərin törətdikləri qanlı cinayətlər artıq üzə çıxıb. Türkiyə tərəfi beynəlxalq aləmdə bu məsələ ilə bağlı öz mövqeyini bildirib, arxivlərini açıb. Əgər ermənilərdə də bu məsələ ilə bağlı hansısa sənəd varsa, ortaya çıxarmalıdırlar. YAP icra katibinin müavini deyib: “Təəssüflər olsun ki, Qərb dairələri Türkiyəyə təzyiq göstərmək üçün bu yalanlardan istifadə edirlər. Kimlərsə 100 il əvvələ qayıtmaqdansa, Qarabağda, Xocalıda törədilən qanlı faciələrə nəzər salmalıdırlar. Kimlərsə uydurma “soyqırımı” ilə bağlı yalanları qəbul edirlərsə, onlar tarixi təhrif edirlər”.
Sonra AMEA-nın Tarix İnstitutunun aparıcı elmi işçısı Vasif Qafarov, Türkiyə Respublikasının Atatürk Araşdırma Mərkəzinin rəhbəri Mehmet Ali Beyhan, Dumlupınar Universitetinin professoru Abdullah İlgazi, İstanbul Universitetinin professoru Xəlil Bal, AMEA-nın Tarix İnstitutunun baş elmi işçısı İlqar Niftəliyev, Fırat Universitetinin professoru Osman Umar erməni yalanlarını faktlarla açıb göstərən məruzələrlə çıxış ediblər. Bildirilib ki, arxiv sənədlərinə baxıldıqda uydurma “erməni soyqırımı”nın heç bir tarixi fakta söykənmədiyi açıq-aşkar görünür. Həmin vaxtı əli silah tutan hər bir türk övladı Çanaqqala döyüşündə Vətənini müdafiə edirdi. Çanaqqala döyüşündə türk əsgərləri yaralı düşmənə belə yardım göstərməklə dünyaya müharibələr tarixində görünməyən insanlıq dərsi keçiblər. Çıxışlarda ermənilərin azərbaycanlılara qarşı həyata keçirdikləri soyqırımı siyasətindən və törətdikləri qanlı terror aktlarından da danışılıb.
Məruzələrdən sonra çıxış edən Türkiyənin Azərbaycandakı səfiri İsmail Alper Coşkun aprelin 24-nün Türkiyə tarixinə qarşı bir qarayaxma günü olduğunu bildirib. Diplomat Çanaqqalada baş vermiş qanlı döyüşlərdən söhbət açaraq deyib ki, həmin savaşda Azərbaycan və türk oğulları birlikdə döyüşüb və şanlı tarix yazıblar. Diplomat Türkiyənin Çanaqqala zəfərinin 100-cü ildönümü ərəfəsində bütün dünyaya bir sülh mesajı verdiyini qeyd edib.
Səfir ermənilərin qondarma “soyqırımı” iddiaları ilə bağlı arxiv sənədlərinə baxılmasının, kompleks araşdırmaların aparılmasının vacibliyini bildirib: “Görünür ki, məqsəd həqiqətin öyrənilməsi deyil. Bir sıra dövlətlər, təşkilatlar tarixdən siyasi alət kimi istifadə etməyə çalışırlar”.
Konfransın önəmini qeyd edən YAP icra katibinin müavini, Milli Məclisin deputatı Siyavuş Novruzov bu cür tədbirlərin silsilə xarakteri almasının vacibliyini vurğulayıb. Erməni yalanları bütün yerli və beynəlxalq təşkilatlarda mütəmadi surətdə qaldırılmalı və tarixi faktlarla ifşa olunmalıdır. Diaspor təşkilatları da bu işdə mühüm rol oynaya bilərlər. Deputat bu məsələnin bir sıra dövlətlər tərəfindən gündəmə gətirilməsinin bir başa Türkiyənin inkişafı və artan nüfuzu ilə bağlı olduğunu söyləyib: Dünyanın bəzi dövlətləri Türkiyənin güclənməsindən narahatdırlar və buna görə də uydurma erməni iddialarından istifadə edirlər.
Milli Məclis sədrinin müavini Bahar Muradova ermənilərin dünyanı qondarma “soyqırımı” ilə bağlı əsassız iddialara inandırmaq cəhdlərinin qarşısını almaq üçün birgə səylərin daha da gücləndirilməsinə ehtiyac olduğunu qeyd edib: Biz daha məqsədyönlü, qlobal, ardıcıl hədəflər istiqamətində çalışmalıyıq. Sədr müavini bu gün Türkiyənin və Azərbaycanın dünyada önəmli mövqeyə sahib olduqlarını bildirərək diqqətə çatdırıb ki, bu mövqeyi birgə gündəlik işlə daha möhkəmləndirmək qarşıda duran əsas hədəflərdən biridir.
Bölmənin digər xəbərləri
