Vaşinqtonda brifinqdə Azərbaycanın işğal edilmiş əraziləri probleminə toxunulub
Vaşinqton, 12 dekabr, AZƏRTAC
Vaşinqtonda ABŞ dövlət katibinin müavini, Dövlət Departamentinin Siyasi və Hərbi Münasibətlər Bürosunun başçısı Punit Talvarın iştirakı ilə brifinq keçirilib. Brifinqdən əvvəl Dövlət Departamentinin nümayəndəsi ABŞ hökumətinin adi silahların məhv edilməsini nəzərdə tutan ”Yer üzündə təhlükəsiz gəzmək” adlı proqramlarına dair hesabatının 13-cü nəşri barədə məlumat verib. Sənəddə ABŞ-ın postmünaqişə regionlarında minaların və partlayış təhlükəli əşyaların tərəfdaşlar ilə əməkdaşlıq şəraitində zərərsizləşdirməsi tədbirləri təqdim olunur. ABŞ 1993-cü ildən atıcı silahların və döyüş sursatının təhlükəsiz şəkildə məhv edilməsinə, partlamamış mərmilərin zərərsizləşdirilməsinə və kənarlaşdırılmasına 2 milyard dollardan çox vəsait xərcləyib.
Hesabatın Azərbaycana həsr olunan hissəsində deyilir ki, 2002-ci ilin sentyabrından 2003-cü ilin iyununadək keçirilən “Azərbaycanda minalanmış ərazilərin təsirinin təhlili”nə görə, Ermənistan-Azərbaycan sərhədində və işğal edilmiş Qarabağ regionunda Ermənistan qoşunları ilə Azərbaycan qoşunlarının təmas xəttində, xüsusən Füzuli rayonunda partlayış təhlükəli əşyalar ilə bağlı problem var. Bir neçə il sürən minalardan təmizləmə tədbirlərindən sonra - 2012-ci ilin əvvəllərinə doğru təsir zonasının radiusu azaldılaraq, 112 kvadrat kilometrə çatdırılıb. “Yer üzündə təhlükəsiz gəzmək” hesabatının müəllifləri qeyd edirlər ki, “Minalanmış ərazilərin təsirinin təhlili”ndə Azərbaycanın Ermənistan tərəfindən işğal edilmiş əraziləri haqqında informasiya yoxdur. Hesabatda deyilir: “Ermənistan silahlı qüvvələrinin işğal etdikləri zonalarda minaların və partlayış təhlükəli əşyaların təsiri probleminə dair vəziyyət hələ də ciddidir”.
AZƏRTAC-ın Vaşinqtondakı xüsusi müxbiri Yusif Babanlı Punit Talvardan həmin proqramın suveren ölkələrin nəzarət etmədiyi ərazilərdə döyüş sursatının anbarlara yığılmasının qeydiyyatına necə nəzarət etdiyinə aydınlıq gətirməsini xahiş edib. Axı, mələsən, Ermənistan hökuməti iddia edə bilər ki, onlar əməkdaşlıq edirlər və silahların məhv edilməsi barədə informasiya verirlər, halbuki həmin silahlar məxfi şəkildə Dağlıq Qarabağ kimi nəzarət edilməyən və heç bir ölkə tərəfindən tanınmayan regionlarda anbarlara yığıla bilər.
ABŞ dövlət katibinin müavini bu suala cavabında bildirib ki, proqram humanitar məqsəd daşıyır və onun icrası ABŞ-ın və onun tərəfdaşlarının buraxıldığı zonalar ilə məhdudlaşır. Proqramın Ermənistan və onun döyüş sursatı ilə bağlı hissəsi Ermənistan silahlı qüvvələrinin nəzarəti altında olan ərazilərə deyil, yalnız Ermənistan ərazisinə şamil olunur. Dövlət Departamentinin nümayəndəsi Cerald Hilbert bildirib ki, ABŞ Dövlət Departamentinin bilavasitə Dağlıq Qarabağda işləyən proqramı yoxdur və işğal edilmiş Qarabağın minalardan təmizlənməsi üzrə bəzi proqramlar ABŞ Beynəlxalq İnkişaf Agentliyinin müəyyən maliyyə dəstəyi ilə həyata keçirilir.
Bölmənin digər xəbərləri
