Vüqar Gülməmmədov: Hesablama Palatasının vakant yerlərində UNEC-in payı əhəmiyyətli şəkildə artıb
Bakı, 19 iyun, AZƏRTAC
Son illər Hesabına Palatasının vakant yerlərində UNEC-in payı əhəmiyyətli şəkildə artıb.
AZƏRTAC xəbər verir ki, bunu Hesablama Palatasının sədri Vüqar Gülməmmədov UNEC-in 95 illik yubileyi münasibətilə keçirilən tədbirdə deyib.
O qeyd edib ki, UNEC ilə Hesablama Palatası təhsil sahəsində bir sıra layihələr həyata keçirib: “Həmin layihələr sayəsində son 5 ildə Hesablama Palatasında işə qəbul olunan şəxslərin 47-si UNEC məzunudur. Başqa sözlə, bu, inzibati heyətin təxminən 30 faizini təşkil edir. Buna həm də maliyyə, mühasibat uçotu və audit sahəsində ixtisaslar üzrə UNEC-in zəruri bilik və bacarıqlara malik məzunlar yetişdirməsi səbəb olub”.
Vüqar Gülməmmədov diqqətə çatdırıb ki, 2024-cü ildə UNEC Hesablama Palatasının kənar dövlət maliyyə nəzarəti obyekti olub: “Aparılan audit göstərib ki, bu təhsil ocağı maliyyə təsnifatı fəaliyyətində nümunəvi qurumdur. Qeyd etməliyəm ki, UNEC-in məzunları hazırda təkcə ölkə daxilində deyil, həm də beynəlxalq səviyyədə müxtəlif sahələrdə uğurla fəaliyyət göstərirlər. Bu, universitetin verdiyi təhsilin həm yerli, həm də beynəlxalq standartlara uyğun olduğunu bir daha sübuta yetirir. İnanıram ki, UNEC bundan sonra da ölkəmizin iqtisadi və elmi potensialının genişlənməsində aparıcı rol oynayacaq”.
Bölmənin digər xəbərləri
