Vüqar Rəhimzadə: Əsas hədəf Qarabağın və Şərqi Zəngəzurun dirçəlməsi, hərbi gücümüzün artırılmasıdır
Bakı, 13 iyul, AZƏRTAC
İki ildən artıqdır ki, günümüzün əsas çağırışı işğaldan azad edilmiş ərazilərimizdə bərpa-quruculuq işlərinin həyata keçirilməsi, soydaşlarımızın doğma torpaqlara Böyük Qayıdışının təmin olunmasıdır. Tarixi Zəfərdən dərhal sonra bərpa işlərinə başlamaqla dünya tarixində ilkə imza atan Azərbaycan hazırda özünün təkmil dirçəliş modeli ilə diqqətdədir. İşğaldan azad edilmiş ərazilərimiz müasir tələblər səviyyəsində yenidən qurulur, soydaşlarımız mərhələli şəkildə doğma yurd-yuvalarına qayıdırlar. Prezident İlham Əliyev ilin altı ayının sosial-iqtisadi yekunlarına həsr olunmuş müşavirədə bir daha diqqəti əldə olunan nəticələrə yönəldərək onların fonunda qarşıda duran hədəfləri açıqladı.
Bildirildi ki, əsas istiqamət ölkəmizin dayanıqlı inkişafının təmin edilməsi, qeyri-neft sektorunun inkişafı, Qarabağın və Şərqi Zəngəzurun bərpası, iqtisadi və sosial sahələrdə islahatların davam etdirilməsidir.. Hazırda dövlət büdcəmizin 36 milyard manatdan çox olması ölkəmizin iqtisadi imkanlarının təqdimatıdır. Büdcədən ayırmalarda müdafiə xərcləri daim öndə dayanır. Son iki ildən artıq dövrdə bu ayırmalarda işğaldan azad edilmiş ərazilərimizdə bərpa-quruculuq işlərinə vəsaitlərin yönəldilməsi xüsusi yer tutur. Ümumilikdə bütün bölgələrimizdə infrastruktur layihələri uğurla həyata keçirilir. Bu, ondan irəli gəlir ki, qeyri-neft sektorunun inkişafı, bölgələrin tərəqqisi həyata keçirilən iqtisadi siyasətin əsasını təşkil edir.
AZƏRTAC xəbər verir ki, bu fikirləri Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadə bildirib.
O qeyd edib ki, ölkəmizin iqtisadi imkanlarının artması digər sahələrdə də mühüm addımların atılmasına geniş imkanlar yaradır. Bu günümüz üçün əsas hədəf təbii ki, hərbi gücümüzün artırılmasıdır. Tarixi Zəfərimizdən sonra dövlətimizin başçısı hədəfləri açıqlayarkən ordumuzun gücünün, qüdrətinin daha da artırılacağını xüsusi qeyd etdi. Bircə faktı qeyd etmək kifayətdir ki, cari ilin dövlət büdcəsinə 3 milyard manatdan çox vəsait əlavə edilib, bunun 1,1 milyard manatı hərbi potensialımızın güclənməsinə istiqamətləndirilib. Çünki bu gün ölkə qarşısında duran iki əsas vəzifə məhz bunlardır. Müzəffər Ali Baş Komandan İlham Əliyevin qeyd etdiyi kimi, özümüzü, müstəqilliyimizi, ərazi bütövlüyümüzü qorumaq üçün daha güclü olmalıyıq.
Bu məqam da xüsusi vurğulanıb ki, Prezident İlham Əliyevin qeyd etdiyi kimi, bu gün dünyada güc amili ön plandadır. Güclə hesablaşırlar, gücdən çəkinirlər. Azərbaycan dövləti hər zaman ən yüksək tribunalardan bu çağırışı edir ki, heç bir qüvvə onun siyasi iradəsinə təsir edə bilməz. Azərbaycanın ədalətə və beynəlxalq hüquqa əsaslanan xarici siyasətinin prinsipləri dəyişməzdir. Böyüklüyündən, kiçikliyindən asılı olmayaraq bütün dövlətlərlə bərabərhüquqlu, qarşılıqlı maraq və hörmət prinsipləri əsasında əlaqələr quran Azərbaycan heç bir dövlətin daxili işinə müdaxilə etmir, eyni zamanda, özünün daxili işinə müdaxiləni də yolverilməz hesab edir. Təbii ki, bu prinsiplərin dəyişməzliyi ölkəmizin müstəqil siyasətinə əsaslanır. Azərbaycan istər 30 illik işğal, istər 44 günlük İkinci Qarabağ müharibəsi, istərsə də postmünaqişə dövründə bütün təzyiqlərə baxmayaraq, bir addım belə mövqeyindən geri çəkilmir. Azərbaycanın atdığı addımların əsasında dövlət maraqları, xalqın iradəsi dayanır. Dövlətimizin başçısının müşavirədə səslənddirdiyi “Dünyada qaydalar tamamilə pozulub, davranış qaydalarına, beynəlxalq hüquqa əməl edilmir” çağırışı özündə bütün məqamları ehtiva edir. Əksər dünya gücləri özlərini ədalətin və beynəlxalq hüququn müdafiəçisi kimi təqdim etsələr də əməlləri tamamilə başqa bir mənzərənin təqdimatıdır. Nə qədər ki, dünya gücləri dövlətlər arasında əsas faktor olan etimad mühitinin qorunmasını arxa plana keçirib öz maraqlarını öndə saxlayır beynəlxalq hüquq probleminin yaşanması qaçılmazdır. Prezident İlham Əliyev müşavirədə bununla bağlı bu bəyanatı səsləndirdi: “Dünyanın müxtəlif yerlərində beynəlxalq hüquq işləmir. Beynəlxalq hüquqa, beynəlxalq təşkilatların qərarlarına, qətnamələrinə bel bağlamaq olmaz”.
Vüqar Rəhimzadə qeyd edib ki, Azərbaycan qarşıya qoyduğu hər bir hədəfə zamanında nail olmaq üçün bütün səylərini səfərbər edir. Əsas hədəf Qarabağa və Şərqi Zəngəzura Böyük Qayıdış proqramını uğurla başa çatdırmaqdır.
Bölmənin digər xəbərləri
