Xalqımız şəhidlərin nurlu xatirəsini həmişə uca tutacaqdır
Bakı, 21 yanvar (AZƏRTAC). 20 Yanvar Azərbaycan tarixində həm qanlı faciə, həm də həmrəylik, qəhrəmanlıq günüdür. Xalqımız şəhidlərin nurlu xatirəsini həmişə uca tutacaqdır.
Azərbaycanın müstəqilliyi yolundakı ilk şəhidlərin xatirəsinin yad edilməsi üçün Şəhidlər xiyabanına gələn “Aqrolizinq” Səhmdar Cəmiyyətinin əməkdaşı Pirvəli Həsənov demişdir:
-20 Yanvar faciəsi Azərbaycan xalqının ən ağrılı yerlərindən biridir. Sovet İttifaqı dövründə bir yerdə yaşadığımız ölkənin rəhbərliyinin göstərişi ilə Azərbaycan xalqının azadlıq istəyini boğmaq üçün Bakıya nizami ordu yeridilmişdir. Lakin azadlığı hər bir nemətdən üstün tutan qəhrəman Vətən övladlarımız canları bahasına da olsa öz müqəddəs amallarından bir addım da geri çəkilməyərək misilsiz rəşadət nümunəsi göstərmişlər.
Bu qanlı faciə bizim yaddaşımızdan heç vaxt silinməyəcəkdir. Biz yaşlı nəslin nümayəndələri gənc nəslə 21 il əvvəl törədilmiş cinayətin dəhşətlərini aşılamalı, eyni zamanda, xalqımızın qəhrəman övladlarının Vətən yolunda şəhid olduqlarını onlara çatdırmalıyıq.
Xalqımız şəhidlərimizi heç zaman unutmayacaqlar.
Ölkə rəhbərliyi tərəfindən də 20 yanvar şəhidlərinin xatirəsinin əbədiləşdirilməsi, onlara ən yüksək ehtiramın göstərilməsi istiqamətində mühüm addımlar atılır.
Bölmənin digər xəbərləri
