XALQIMIZA QARŞI TÖRƏDİLƏN TARİXİ CİNAYƏTLƏR UNUDULMAMALIDIR
Bakı, 31 mart (AZƏRTAC). Martın 31-də AMEA-nın Şərqşünaslıq İnstitutunda 31 Mart soyqırımı qurbanlarının xatirəsi yad edilmişdir.
1918-ci ilin 31 mart gününün xalqımız üçün kədərli tarix olduğunu dilə gətirən institutun direktoru, Milli Məclisin deputatı, professor Gövhər Baxşəliyeva ermənilərin Azərbaycan xalqına qarşı zaman-zaman həyata keçirdikləri soyqırımı siyasətindən danışmışdır.
G.Baxşəliyeva ötən əsrin əvvəllərindən başlayan erməni vəhşiliklərinin 1918-1920-ci illərdə daha geniş miqyasda davam etdiyini bildirmişdir: “1918-ci il martın 31-də Bakıda və ölkəmizin digər ərazilərində azərbaycanlıların kütləvi qırğına məruz qalması, doğma yurdlarından didərgin salınması heç kimi biganə qoya bilməz. Həmin qanlı hadisələr zamanı təkcə Bakıda 30 mindən çox dinc sakin qətlə yetirilmiş, Şamaxı, Quba və digər rayonların əhalisi günahsız qurbanlara çevrilmiş, yüzlərlə kənd yandırılaraq yerlə-yeksan edilmişdir”.
1998-ci il martın 26-da ulu öndərimiz Heydər Əliyevin imzaladığı “Azərbaycanlıların soyqırımı haqqında” Fərmanın milli yaddaşımızı dirçəldən, tarixi həqiqətlərin üzə çıxmasına təkan verən mühüm siyasi-hüquqi, mənəvi addım olduğu və həmin sənədə əsasən 31 martın Azərbaycanlıların soyqırımı günü elan edildiyi bildirilmişdir.
Tədbirdə digər çıxış edənlər ötən əsrdə xalqımıza qarşı törədilən kütləvi qırğınları, qarətləri, zorakılıq əməllərini pisləmiş, Azərbaycan həqiqətlərinin dünya ictimaiyyətinə çatdırılmasının vacibliyini vurğulamışlar.
Bölmənin digər xəbərləri
