Xankəndi şəhərində Novruz tonqalının alovlandırılması bayram əhvali-ruhiyyəsini ikiqat artırmış oldu - ŞƏRH
Bakı, 20 mart, AZƏRTAC
“Azərbaycan xalqı Novruz bayramını yüksək əhvali-ruhiyyə ilə qarşılayır. Çünki müstəqillik tariximizdə ilk dəfə olaraq bu bayramı ərazi bütövlüyümüzün və suverenliyimizin bərpası şəraitində qeyd edirik. Martın 18-də Prezident İlham Əliyevin Xankəndi şəhərində Novruz tonqalını alovlandırması isə bayram əhvali-ruhiyyəsini ikiqat artırmış oldu. Çünki uzun illər idi ki, Xankəndi erməni separatizminin yuvasına çevrilmişdi. Artıq bu ağrılı-acılı günlər arxada qaldı”.
AZƏRTAC xəbər verir ki, bu fikirləri Milli Məclisin deputatı, YAP İdarə Heyətinin üzvü Pərvin Kərimzadə deyib.
Deputat bildirib ki, artıq Azərbaycanın hər bir guşəsində bayram tonqalları yandırılır. Prezident İlham Əliyev Xankəndidən xalqımızı bayram münasibətilə təbrik edərkən ərazi bütövlüyümüzün və suverenliyimizin bərpasının tarixi əhəmiyyətindən bəhs edib, xalqımızın, ordumuzun, gənclərimizin şücaətindən bəhs edib. Xüsusilə, antiterror tədbirlərinin səbəbini bir daha vurğulayıb. Dövlətimizin başçısı deyib: “Əfsuslar olsun ki, İkinci Qarabağ müharibəsinin nəticələri Ermənistana dərs olmadı. Keçən ilin Novruz bayramı təbriklərimdə mən bu barədə danışmışdım və təəssüf hissimi bildirmişdim ki, İkinci Qarabağ müharibəsindəki onların məğlubiyyəti onlara dərs olmadı. Əgər dərs olsaydı, antiterror əməliyyatının keçirilməsinə ehtiyac olmazdı. Ermənistan İkinci Qarabağ müharibəsindən sonra keçən üç il ərzində düzgün nəticə çıxarmamışdır, öz qanunsuz silahlı birləşmələrini bizim torpağımızda əbədi saxlamaq istəyirdi, burada vaxtilə qanunsuz yaradılmış qondarma dırnaqarası Dağlıq Qarabağ respublikasını yaşatmaq istəyirdi. Bütün bunlar beynəlxalq hüquqa tamamilə ziddir və ən əsası Azərbaycan xalqının iradəsinə ziddir…Altı ay bundan əvvəl uğurla keçirilmiş antiterror əməliyyatı beynəlxalq hüququn təntənəsidir, Azərbaycan xalqının əyilməz ruhunun təntənəsidir. Biz bir daha göstərdik ki, öz yolumuzdan dönməyəcəyik, Ermənistanın arxasında istənilən qüvvələr dursalar belə, biz öz istədiyimizə nail olacağıq və nail olmuşuq”.
Onun sözlərinə görə, bir zamanlar Azərbaycanla “şərt dili ilə danışan” Ermənistan artıq Qarabağın Azərbaycan ərazisi olduğunu etiraf edir. Təbii ki, bu məsələdə 44 günlük müharibədə qazanılan qələbənin, “Dəmir yumruğ”un payı böyükdur. Qarabağ Azərbaycan ərazisidir və bunu bütün dünya tanıyır, o cümlədən Ermənistan rəhbərliyi artıq bunu başa düşüb. Əgər vaxtilə “Qarabağ Ermənistandır və nöqtə” deyirdisə, indi “Qarabağ Azərbaycandır” deyir və nəinki deyir, hətta bizim ərazimizin ölçülərini də dilə gətirməyi unutmur. Ötən il oktyabrın 15-də isə Müzəffər Ali Baş Komandan, Prezident İlham Əliyev Xankəndi şəhərində, Xocalı, Xocavənd, Ağdərə şəhərlərində, Əsgəran qəsəbəsində üçrəngli bayrağımızı ucaltmaqla xalqımıza növbəti dəfə qürurlu anlar yaşatdı.
1923-cü ildə keçmiş SSRİ tərəfindən Dağlıq Qarabağ Muxtar Vilayətinin yaradılması xalqımız üçün ciddi problemlər yaratdı. Məhz 100 il sonra tarixi ədalət zəfər qazandı. Ötən 100 il ərzində xalqımız nə qədər əzab çəksə də, tarix bizi nə qədər sınağa çəksə də, əyilmədik, sınmadıq. Ali Baş Komandan, Prezident İlham Əliyev Xankəndidə, Xocalıda, Ağdərədə, Xocavənddə və Əsgəranda Azərbaycan bayrağını ucaltmaqla dövlətimizin və xalqımızın gücünü bütün dünyaya nümayiş etdirdi. Çox qürurvericidir ki, Xankəndi şəhərinin mərkəzi meydanı “Zəfər” meydanı adlandırılacaq. Eləcə də bu şəhərdə separatçıların inşa etdiyi tikililər sökülür. Dövlət başçısının dediyi kimi, Xankəndi tarixən xalqımıza məxsus olub, lakin sovetlər hakimiyyəti dövründə burada ermənilər üstünlük təşkil edib. Buna baxmayaraq, şəhərin inkişafında, quruculuq işlərində azərbaycanlı mütəxəssisləri yaxından iştirak ediblər. Cənab Prezident çıxışında bu məqamı faktlarla vurğuladı: “Bax, təkcə bu misallar onu göstərir ki, bu şəhəri və keçmiş Dağlıq Qarabağ Muxtar Vilayətində olan bütün şəhərləri, kəndləri salan, yaradan, memarlığının müəllifi olan, inşaat işlərində iştirak edən Azərbaycan xalqının nümayəndələri idi. Bu binalar bizim tarixi sərvətimizdir. Onlar qorunur, qorunacaq və gördüyünüz kimi, indi əsaslı təmir edilir. Durduğum yerdə isə separatçılar qondarma parlament binası inşa etmişdilər. Gördüyünüz kimi, artıq burada heç bir bina yoxdur. Bu, azmış kimi, onlar elə Şuşada ikinci parlament binasını inşa etməyə çalışırdılar, onun inşa işləri başlamışdır, amma çatdıra bilməmişlər və o bina söküldü”.
Hazırda işğaldan azad edilmiş bütün ərazilərdə böyük quruculuq işlərinin aparıldığını deyən Pərvin Kərimzadə qeyd edib ki, artıq keçmiş məcburi köçkünlər doğma yurdlarına qayıdır, bu qayıdışın sevincini yaşayırlar. Azərbaycan xalqı böyük və güclü xalq olaraq bu torpaqlarda bayramları təntənə ilə qeyd edəcək, xoş günlər, firavanlıq içində yaşayacaq.
Bölmənin digər xəbərləri
