Xarici ölkələrdə yaşayan soydaşlarımızın təşkilatlanması Azərbaycan dövlətinin daim diqqət mərkəzindədir
Sırdərya, 8 mart (AZƏRTAC). Daşkənddəki Heydər Əliyev adına Azərbaycan Mədəniyyət Mərkəzində kitabının təqdimat mərasimində iştirak etmək üçün Özbəkistana gəlmiş Milli Məclisin deputatı, Azərbaycan-Özbəkistan parlamentlərarası dostluq qrupunun üzvü, Xalq Şairi Sabir Rüstəmxanlı Sırdərya vilayətində yaşayan azərbaycanlılarla görüşmüşdür.
Sırdərya rayon hakimiyyəti başçısının birinci müavini Qafur Əhmədov vilayətdə, həmçinin Sırdərya rayonunda 1937-ci ildə bu torpaqlara sürgün olunmuş xeyli azərbaycanlıların yaşadıqlarını bildirmişdir. Rayonun ən böyük yaşayış məntəqələrindən olan Məlik kəndində məskunlaşan əhalinin əksəriyyəti isə azərbaycanlıdır və burada hamı bir-biri ilə Azərbaycan dilində danışır.
Sabir Rüstəmxanlı salona toplaşan soydaşlarımızı salamlayaraq bildirmişdir ki, Özbəkistana Daşkənddə özbək dilində çap olunmuş “Göy Tanrı” romanının təqdimat mərasimində iştirak etmək üçün gəlmişəm və sizinlə görüşməyi də özümə borc bildim.
Onun sözlərinə görə, hazırda dünyanın təxminən 70 ölkəsində 50 milyondan artıq soydaşımız yaşayır və onlara qayğı Azərbaycan dövlətinin daim diqqət mərkəzindədir. Xarici ölkələrdə yaşayan soydaşlarımızın təşkilatlanması, məhsuldar fəaliyyət göstərməsi üçün Bakıda Diasporla İş üzrə Dövlət Komitəsi yaradılmışdır və uğurla fəaliyyət göstərir.
Milli Məclisin deputatı ölkəmizin Ermənistan-Azərbaycan, Dağlıq Qarabağ münaqişəsinin həlli istiqamətində təşəbbüsləri, Azərbaycandakı sosial-iqtisadi inkişaf, neft layihələri və digər məsələlər haqqında ətraflı məlumat vermişdir.
Azərbaycanın Özbəkistandakı səfirliyinin müşaviri Akif Əliyev bildirmişdir ki, ötən il Azərbaycan Prezidenti İlham Əliyevin Özbəkistana, 2008-ci ildə isə Özbəkistanın dövlət başçısı İslam Kərimovun Azərbaycana rəsmi səfərləri əlaqələrimizin daha da gücləndirilməsinə şərait yaratmışdır.
Daşkənddəki Azərbaycan Mədəniyyət Mərkəzinin sədri Mobil Məmmədov, vilayətdəki Azərbaycan Mədəniyyət Mərkəzinin sədri Pənah Əzizov, burada yaşayan həmvətənlərimizdən Qüdrət Məmiyev, Əli Nəsirli və başqaları belə mədəni tədbirlərin keçirilməsinə daha çox ehtiyac olduğunu bildirmişlər.
Tədbirdə soydaşlarımız Vətən haqqında şeirlər oxumuşlar.
Qulu Kəngərli
AZƏRTAC-ın xüsusi müxbiri
Sırdərya
Bölmənin digər xəbərləri
