Xətai rayonunda “Ürəklərdə yaşayan dahi” mövzusunda tədbir təşkil olunub
Bakı, 3 may, AZƏRTAC
Mayın 3-də Xətai Rayon İcra Hakimiyyətinin, Yeni Azərbaycan Partiyası (YAP) Xətai rayon təşkilatının və 2 nömrəli Uşaq-Gənclər İnkişaf Mərkəzinin birgə təşkilatçılığı ilə Ulu Öndər Heydər Əliyevin anadan olmasının 100 illiyinə həsr olunan “Ürəklərdə yaşayan dahi” mövzusunda tədbir keçirilib.
YAP Xətai rayon təşkilatından AZƏRTAC-a bildirilib ki, əvvəlcə tədbir iştirakçıları 2 nömrəli Uşaq-Gənclər İnkişaf Mərkəzində təhsil alan şagirdlərin dahi şəxsiyyət Heydər Əliyevə həsr etdikləri rəsm əsərləri ilə tanış olublar.
Tədbirdə müasir müstəqil Azərbaycan dövlətinin qurucusu, Ümummilli Lider Heydər Əliyevin və ərazi bütövlüyümüzün bərpası uğrunda döyüşlərdə şəhidlik zirvəsinə ucalan Vətən oğullarının xatirəsi bir dəqiqəlik sükutla yad edildi.
Xətai Rayon İcra Hakimiyyətinin başçısı Rafiq Quluyev çıxış edərək deyib ki, Ulu Öndər Heydər Əliyevin zəngin həyat yolu və müstəsna fəaliyyətinin bütün mərhələləri bir-birini tamamlayıb, öz xalqına sıx bağlılığın, milli dövlətçilik məfkurəsinə sadiqliyin canlı təcəssümü olub. Müasir müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir.
YAP Xətai rayon təşkilatının sədri Vüqar Rəhimzadə qeyd edib ki, Azərbaycan xalqı müstəqilliyimizin ilk illərində böyük faciələrlə, çətinliklərlə üz-üzə qalsa da, 1993-cü ildə Ulu Öndər Heydər Əliyevin xalqın təkidli tələbi ilə hakimiyyətə qayıdışı gələcəyimizin daha parlaq, işıqlı olacağına böyük əminlik yaradıb. Çünki düşünülmüş və məqsədyönlü siyasət daim hər bir ölkəyə böyük uğurlar qazandırır, onu əsl söz sahibinə çevirir, müstəqil addım atmasını şərtləndirir. Məhz bunun nəticəsidir ki, ölkəmiz müstəqilliyinin bərpasından ötən illərdə 100 ilə bərabər inkişaf yolu keçib.
V.Rəhizmadə bildirib ki, Azərbaycanın hər bir uğuru Heydər Əliyev siyasətinin təntənəsidir. Bu uğurların zirvəsində dayanan tarixi Zəfərimiz Azərbaycanın keçdiyi inkişaf yolunun təqdimatıdır.
Tədbirdə Ümummilli Lider Heydər Əliyevin həyat və fəaliyyətini əks etdirən videoçarx nümayiş olunub.
2 nömrəli Uşaq-Gənclər İnkişaf Mərkəzində təhsil alan şagirdlər şeirlər söyləyib və bədii kompozisiya nümayiş olunub.
Bölmənin digər xəbərləri
