XOCALI FACİƏSİNİN 18-Cİ İLDÖNÜMÜ İLƏ ƏLAQƏDAR ABŞ-DA ANMA MƏRASİMİ KEÇİRİLMİŞDİR
Vaşinqton, 26 fevral (AZƏRTAC). Amerikanın Azərbaycan və Türkiyə diaspor təşkilatları “Xocalıya Ədalət!” kampaniyası çərçivəsində ABŞ-ın nüfuzlu Corc Vaşinqton Universitetində anma mərasimi keçirmişlər.
Tədbirdə Azərbaycanın ABŞ-dakı səfiri Yaşar Əliyev, Azərbaycan- Amerika Şurasının direktoru Cavid Hüseynov və ABŞ-dakı Azərbaycan Cəmiyyətinin başçısı Tomris Azəri çıxış edərək, 18 il əvvəl Azərbaycanın Xocalı şəhərində Ermənistanın və keçmiş SSRİ-nin 366-cı motoatıcı alayının silahlı birləşmələri tərəfindən günahsız insanlara qarşı həyata keçirdikləri qətliam barədə danışmışlar. Səfir Y.Əliyev qeyd etmişdir ki, bu gün dünyanın 42 ölkəsində Xocalı faciəsi qurbanlarının xatirəsi yad edilir. Bəşəriyyətə qarşı törədilən bu amansız cinayət barədə həqiqətlərin İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanan “Xocalıya ədalət!” kampaniyası çərçivəsində yayılması işinə dünyanın hər yerindən gənclər qoşulurlar.
Tədbirdə Xocalı faciəsi qurbanlarının Heydər Əliyev Fondu tərəfindən hazırlanan fotosərgisi və sənədli film nümayiş etdirilmişdir. Anma mərasimində xüsusi qonaqlar kimi “Xocalıya ədalət” beynəlxalq məlumat-təşviqat kampaniyası çərçivəsində eyniadlı mahnı yazan amerikalı rep ifaçısı Toni Bləkmən və prodüsser Qordon Uilyams da var idi. Xanım Bləkmən çıxışında qeyd etmişdir ki, Xocalıda baş verən hadisələr barədə öyrəndikdən sonra, musiqi kimi təsirləndirici təşviqat vasitəsindən istifadə etmək qərarına gəlmiş, faciə haqqında həqiqətləri dünyaya mahnı ilə çatdırmaq istəmişdir. Çünki heç bir xalq belə zülm və ədalətsizliklə qarşılaşmamalıdır.
Mərasimdə nümayiş etdirilən "Xocalıya Ədalət!" mahnısının klipi iştirakçılar tərəfindən alqışlarla qarşılanmışdır.
Qeyd edək ki, "Xocalıya Ədalət!" kampaniyası çərçivəsində builki anma mərasimləri, həmçinin Kaliforniya, Yuta və Nyu-York ştatlarında da keçirilmişdir. Azəbaycan icmasının üzvləri Xocalı faciəsi qurbanlarının xatirəsini Vaşinqton və Nyu-York şəhərlərində Ermənistan diplomatik nümayəndəliklərinin qarşısında təşkil etdikləri etiraz aksiyaları ilə də yad etmişlər.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
