Xocalı soyqırımı ermənilər tərəfindən planlı şəkildə həyata keçirilib
Bakı, 23 fevral, AZƏRTAC
UNEC-in nəzdindəki Maliyyə-İqtisad Kollecində Xocalı soyqırımının 25-ci ildönümünə həsr olunmuş anım tədbiri keçirilib.
UNEC-dən AZƏRTAC-a bildiriblər ki, mərasimdə kollecin direktoru Həmzə Ziyadov Xocalı soyqırımının ermənilər tərəfindən planlı şəkildə həyata keçirildiyini söyləyib. Qeyd olunub ki, Xocalının dinc sakinləri məhz azərbaycanlı olduqlarına görə qətlə yetiriliblər, misli görünməyən işgəncələrə məruz qalıblar.
Direktor Xocalı həqiqətlərinin, eləcə də Ermənistanın işğal etdiyi Azərbaycan torpaqlarında törətdiyi vandalizm aktlarının beynəlxalq ictimaiyyətə çatdırılması üçün gəncləri xüsusi fəallıq göstərməyə çağırıb.
Kollecin tələbələri “Xocalı fəryadı” adlı bədii kompozisiya ilə çıxış ediblər.
Sonda “Ruhum Qarabağlıdır” sənədli filmi nümayiş olunub.
Bölmənin digər xəbərləri
