Pekin, 26 fevral, AZƏRTAC

Xocalı soyqırımının 29-cu ildönümü ilə əlaqədar Azərbaycanın Çindəki səfirliyində anım mərasimi keçirilib.

AZƏRTAC xəbər verir ki, Çində yaşayan soydaşlarımızın və tələbələrin iştirak etdikləri tədbirdə Xocalı soyqırımı qurbanlarının, Azərbaycanı azadlığı, ərazi bütövlüyü və suverenliyi uğrunda şəhid olanların xatirəsi bir dəqiqəlik sükutla yad edilib.

Səfir Əkrəm Zeynallı 1991-ci ildə yenidən müstəqilliyinə qovuşan Azərbaycan xalqının ağır və faciəli hadisələrlə üz-üzə qaldığını, torpaqlarının bir hissəsinin qonşu Ermənistan tərəfindən hərb yolu ilə işğal edildiyini, bir milyondan çox soydaşımızın öz torpaqlarından qovulduğunu bildirib. Bu ağır sınaqların ən çətini isə 1992-ci ilin fevral ayının 25-dən 26-na keçən gecə yaşanan Xocalı hadisələri olub. Xocalı soyqırımının erməni millətçilərinin Azərbaycan xalqına olan nifrətinin və onların terrorçu xislətinin parlaq təzahürü olduğunu bildirən səfir Əkrəm Zeynallı, mühasirədə olan şəhərin yüzlərlə dinc sakininin bir gecədə xüsusi amansızlıqla qətlə yetirildiyini, girov götürülənlərin dəhşətli işgəncələrə məruz qaldığını, xeyli insanın yaralandığını deyib. Bu hadisə Ermənistan-Azərbaycan, Dağlıq Qarabağ münaqişəsinin tarixində bir gecədə ən çox mülki adamın erməni silahlıları tərəfindən öldürülməsi idi.

Səfir Ə.Zeynallı tarixi ədalətin gec-tez bərpa olunduğunu, bu xüsusda ötən ilin payızında 44 gün davam etmiş Vətən müharibəsi zamanı Ali Baş Komandan, Prezident İlham Əliyevin rəhbərliyi altında Sılahlı Qüvvələrimizin Ermənistanın 30 ilə yaxındır davam edən işğal və təcavüzü siyasətinə son qoyduğunu, Azərbaycanın ərazi bütövlüyünü bərpa etdiyini bildirib. Bu Zəfər həm də bütün şəhidlərimizin, o cümlədən Xocalı soyqırımı quranlarının qisasının alınması idi.

Qeyd olunub ki, gələcəkdə bəşəriyyətin bu cür faciələri yenidən yaşamaması üçün baş verən cinayətlərə lazımi hüquqi-siyasi qiymət verilməlidir. Buna nail olmaq üçün dünya ictimaiyyətinin Xocalı soyqırımı haqqında məlumatlandırılması işlər davamlı olaraq aparılır. Heydər Əliyev Fondunun vitse-prezidenti Leyla Əliyevanın təşəbbüsü ilə beynəlxalq ictimaiyyətin məlumatlandırılması üçün “Xocalıya ədalət!” kampaniyasına bu prosesdə böyük rol oynayır. Artıq bir neçə ölkənin parlamenti bu faciəni törədənləri qınayan bəyanatlar və sənədlər qəbul ediblər.

Sonra Xocalı hadisələrindən bəhs edən film nümayiş olunub. Səfirliyin binası önündə Xocalı soyqırımını əks etdirən şəkillərdən ibarət guşəsi yaradılıb. Çin ictimaiyyətinin Xocalıda baş verənlər barədə məlumatlandırılması üçün səfirliyin sosial şəbəkə hesablarında məlumatlar, video və şəkillər yerləşdirilib.

Şahin Cəfərov

AZƏRTAC-ın xüsusi müxbiri

Pekin