Xocalı soyqırımı XX əsrin ən böyük faciələrindən biridir VİDEO
Bakı, 21 fevral, AZƏRTAC
Fevralın 21-də Fövqəladə Hallar Nazirliyinin (FHN) Akademiyasında Xocalı soyqırımının 25-ci ildönümünə həsr olunmuş anım tədbiri keçirilib.
FHN-dən AZƏRTAC-a bildiriblər ki, tədbir iştirakçıları əvvəlcə soyqırımı qurbanlarının xatirəsini bir dəqiqəlik sükutla yad ediblər.
Akademiyanın rəisi, general-mayor Pənah Süleymanov sovet ordusuna məxsus 366-cı motoatıcı alayın iştirakı ilə erməni qəsbkarları tərəfindən törədilən Xocalı soyqırımını XX əsrin ən böyük faciələrindən biri adlandırıb. Qeyd edib ki, həmin müdhiş hadisə nəticəsində 63-ü uşaq, 106-sı qadın, 70-i yaşlı olmaqla 613 sakin qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsindən 487 nəfər yaralanıb, 1275 nəfər əsir götürülüb. Girov götürülənlərdən 150-sinin, o cümlədən 68 qadın və 26 uşağın taleyi bu günədək məlum deyil.
Fövqəladə hallar nazirinin müavini, general-leytenant Etibar Mirzəyev bildirib ki, erməni millətçilərinin tarix boyu xalqımıza qarşı həyata keçirdikləri məkrli siyasət, o cümlədən Xocalı soyqırımı barəsində gənc nəslə, xüsusən də kursantlara, əsgərlərə ətraflı məlumat verilməli, düşmənin kimliyi tanıdılmalıdır. Nazir müavini Xocalı faciəsinə ilk hüquqi-siyasi qiymətin ulu öndər Heydər Əliyev tərəfindən verildiyini vurğulayıb. E.Mirzəyev xalqımıza qarşı törədilən qətliamların dünya ictimaiyyətinin diqqətinə çatdırılmasında Azərbaycan Prezidenti İlham Əliyevin və Heydər Əliyev Fondunun əvəzsiz xidmətlərindən danışıb. O, əmin olduğunu bildirib ki, Ali Baş Komandanın rəhbərliyi ilə dədə-baba yurdlarımıza qayıdacağımız gün uzaqda deyil və məhz həmin gün şəhidlərimizin ruhu rahatlıq tapacaq.
FHN işçilərinin həmkarlar ittifaqının sədri Mehman İsmayılov fevralın 25-dən 26-na keçən gecə Xocalıda törədilən kütləvi qırğının erməni millətçilərinin azərbaycanlılara qarşı həyata keçirdiyi növbəti soyqırımı olduğunu vurğulayıb. O, azərbaycanlılara qarşı həyata keçirilmiş soyqırımı və deportasiyaların tarixinə nəzər salaraq bildirib ki, qan yaddaşımıza çevrilmiş bu hadisə unudulmamalı, soyqırımı qurbanlarının xatirəsi qəlbimizdə əbədi yaşamalıdır.
Xocalı Rayon İcra Hakimiyyəti başçısının müavini Vahid Əliyev bu soyqırımının xalqımıza qarşı planlı şəkildə gerçəkləşdirilmiş terror, deportasiya və etnik təmizləmə siyasətinin tərkib hissəsi kimi, təkcə Azərbaycan xalqına deyil, bütün insanlığa qarşı yönəlmiş ən ağır cinayət olduğunu diqqətə çatdırıb.
Milli Məclisin deputatı, professor Elman Nəsirov xalqımızın başına gətirilmiş faciələrdən nəticə çıxarmağın vacibliyini vurğulayıb. Xocalı faciəsinin bütün əlamətlərinə görə beynəlxalq terror aktı olduğunu bildirən deputat bu hadisənin günahkarlarının layiqli cəzalarının alacaqlarına əminliyini ifadə edib.
Çıxışlardan sonra tədbir iştirakçıları İrəvan Dövlət Azərbaycan Dram Teatrının kollektivi tərəfindən səhnələşdirilən “Soyqırımı tarixinin dastanı” tamaşasını izləyiblər.
Bölmənin digər xəbərləri
