Xocalı soyqırımının günahkarları cəzasız qalmayacaqlar
Bakı, 25 fevral (AZƏRTAC). Fevralın 25-də Rabitə və İnformasiya Texnologiyaları Nazirliyində Xocalı faciəsinin 20-ci ildönümünə həsr olunmuş tədbir keçirilmişdir.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə tər güllər düzmüşlər. Sonra Xocalı şəhidlərinin xatirəsi bir dəqiqəlik sükutla yad edilmişdir.
Rabitə və informasiya texnologiyaları naziri Əli Abbasov Xocalı faciəsinin bəşəriyyət tarixinə insanlığa qarşı vəhşiliyinə və qəddarlığına görə ən dəhşətli kütləvi terror hadisəsi kimi daxil olduğunu bildirmişdir.
Nazir qeyd etmişdir ki, 1988-ci ildən başlamış Ermənistan-Azərbaycan, Dağlıq Qarabağ münaqişəsi tarixində ən müdhiş hadisələrdən biri Xocalıda baş vermiş soyqırımı olmuşdur. Xocalı faciəsi tarixdə bizə məlum olan Babiy Yar, Xatın, Sonqmi faciələri ilə eyni səviyyədə durur.
Xocalı faciəsi iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir. Təkcə XX əsrdə bir neçə dəfə ermənilər tərəfindən etnik təmizləmə aparılmış, azərbaycanlıların öz torpaqlarından zorla qovulması siyasəti həyata keçirilmişdir.
Vurğulanmışdır ki, Prezident İlham Əliyev soyqırımı ilə bağlı həqiqətləri, xalqımızın bu məsələyə barışmaz mövqeyini dünya ictimaiyyətinə bir daha çatdırmış və qətliamda günahkar olan insanların törətdikləri cinayətə görə cavab verəcəklərini bəyan etmişdir.
Artıq dövlət və ictimai təşkilatlar səviyyəsində Xocalı soyqırımını bütün dünyaya çatdırılması istiqamətində məqsədyönlü işlər görülmüşdür. Bir çox ölkələrdə soyqırımının 20 illiyi ilə əlaqədar tədbirlər hazırda da davam edir.
Tədbirdə çıxış edən Xocalı sakinləri o müdhiş hadisəni bir daha xatırlayaraq, bir gecənin içərisində erməni silahlı dəstələrinin şəhəri viran qoyduqlarını, yüzlərlə insanı amansızlıqla qətlə yetirdiklərini və şikəst etdiklərini diqqətə çatdırmışlar. Bildirilmişdir ki, xalqımız bu faciəni heç zaman unutmayacaq və bu qətliam hər bir azərbaycanlının qan yaddaşında daim həkk olunacaqdır. Xocalı sakinləri ötən müddətdə hərtərəfli dövlət qayğısı ilə əhatə olunduqlarını vurğulamış və bu diqqətə görə dövlətimizin başçısına minnətdarlıqlarını ifadə etmişlər.
Bölmənin digər xəbərləri
