XOCALILILAR ÇEXİYA RESPUBLİKASININ LİDİTSE QƏSƏBƏSİNDƏ TÖRƏDİLMİŞ SOYQIRIMININ 68-Cİ İLDÖNÜMÜNÜ QEYD ETMİŞLƏR
Goranboy, 10 iyun (AZƏRTAC). Artıq 3 ilə yaxındır ki, xocalılılar oxşar faciəni yaşamış Çexiya Respublikasının Liditse qəsəbəsi ilə əlaqələr qurmuş, birgə tədbirlər keçirməklə bütün insanların diqqətini bəşəriyyət əleyhinə olan bu qanlı faciəyə yönəltmişlər. 2007-ci ildə bağlanmış qarşılıqlı əməkdaşlıq haqqında memoranduma əsasən hər iki xalqın nümayəndələri tez-tez Cexiyada və Azərbaycanda olmuş, maraqlı görüşlər keçirməklə tarixin qanlı hadisələrini bir daha yada salmaqla insanlıq əleyhinə törədilmiş qanlı cinayətləri pisləyərək onun günahkarlarının cəzalandırılmasını tələb etmişlər.
Hər il Cexiyanın Liditse qəsəbəsində Xocalı faciəsi qeyd edildiyi kimi, Liditse faciəsinin ildönümü də xocalılıların məskunlaşdıqları Aşağı Ağcakənddə qeyd edilir.
1942-ci il iyunun 10-da törədilmiş soyqırımının növbəti ildönümü də xocalılılar tərəfindən dərin hüznlə qeyd edilmişdir. Xocalı mədəniyyət evində keçirilən mərasimdə Xocalıda və Liditsedə şəhid olanların xatirəsi bir dəqiqəlik sükutla yad edildikdən sonra 68 il əvvəl Liditse qəsəbəsində törədilmiş qanlı aksiyanı əks etdirən videofilmin nümayişi olmuşdur. Sənədli kadrlarla zəngin olan filmdə dinc sakinlərə qarşı törədilən vəhşiliklər mərasim iştirakçıları tərəfindən qəzəb hissi ilə qarşılanmışdır.
Sonra bu yaxınlarda nümayəndə heyəti ilə Cexiya Respublikasında olmuş Xocalı rayon İcra hakimiyyəti başçısının birinci müavini Vahid Əliyev səfər təəssüratlarından danışmış, 1941-1945-ci il müharibəsi başa çatdıqdan sonra yerlə-yeksan olmuş Liditse qəsəbəsinin yerində salınmış “Xatirə kompleksi”ndə görülən işlər barədə ətraflı məlumat vermişdir. Qeyd olunmuşdur ki, 13 hektar sahədə yerləşən kompleksdə 140 ölkədən gətirilən güllər içərisində Azərbaycanın da qızıl gülləri vardır. Qəsəbədə öldürülmüş 460 nəfərdən 82-si 1-15 yaşında olan uşaqlardır. Kompleksdə həmin uşaqların hər biri üçün heykəl ucaldılmışdır. Ümumilikdə isə burada 422 heykəl vardır. Hər il “Xatirə kompleksi”ni 3 milyondan çox turist ziyarət edir və burada törədilmiş faciə ilə əlaqədar kompleksdəki rəsm qalereyasında, muzeydə, kinozalında və digər yardımçı obyektlərdə zəngin məlumat əldə edirlər.
Mərasimdə rayon icra hakimiyyəti başçısının müavini Göyüş Həsənovun da çıxışı maraqla qarşılanmışdır. Cexiyanın Liditse qəsəbəsi ilə qurulmuş əlaqələrin daha da inkişaf etdirilməsində həyata keçirilən tədbirlərdən danışan natiq qeyd etmişdir ki, ermənilərin Azərbaycan torpaqlarının 20 faizini işğal etməsi, işğal zamanı həyata keçirdikləri vəhşiliklər, eləcə də Xocalıda dinc sakinlərə qarşı amansız soyqırımı barədə Liditsedə geniş və əhatəli məlumat vardır. Elə bunun nəticəsidir ki, keçən il Liditsedə Xocalı küçəsinin açılışı olmuşdur. Buna cavab olaraq Liditse qəsəbəsində törədilən faciənin 68-ci ildönümü ərəfəsində Goranboy rayon İcra hakimiyyəti başçısının sərəncamı ilə Aşağı Ağcakənd qəsəbəsində mərkəzi küçələrdən birinə “Liditse” adı verilmişdir. Belə bir təşəbbüsün reallaşması mərasim iştirakçıları tərəfindən alqışlarla qarşılanmışdır.
Bölmənin digər xəbərləri
