-Möhtərəm Prezident, cənab Ali baş komandan!

2005-ci il oktyabr ayının 5-də Xüsusi Dövlət Mühafizə Xidmətinin hərbi şəhərciyinin açılış mərasimində şəxsi heyətlə görüş zamanı Siz demişdiniz: “Azərbaycan tarixinin ən çətin anlarında, 1994-1995-ci illərdə Xüsusi Dövlət Mühafizə Xidməti ulu öndər Heydər Əliyevi qorudu, onun mühafizəsini təmin etdi və beləliklə, Azərbaycan dövlətçiliyinin müstəqilliyini qorudu”. Bu, xidmətimizin hər bir hərbi qulluqçusu üçün ən yüksək qiymətdir və hər birimizi ötən iki il ərzində daha əzmlə çalışmağa, öz vəzifə borclarına daha məsuliyyətlə yanaşmağa, döyüş tapşırıqlarını layiqincə yerinə yetirməyə ruhlandırmışdır.

Birbaşa Azərbaycan Respublikasının Prezidentinə tabe olan Xüsusi Dövlət Mühafizə Xidməti ötən müddət ərzində Azərbaycan Respublikası Prezidentinin və dövlət mühafizəsi obyektlərinin, mühafizə olunan obyektlərin, Azərbaycanda səfərdə olan xarici ölkələrin dövlət və hökumət başçılarının təhlükəsizliyini təmin etmiş, baş verə biləcək terror və təxribat hallarının qarşısını almaq istiqamətində zəruri tədbirlər hazırlayıb həyata keçirmişdir.

Bununla yanaşı, son iki ildə Xüsusi Dövlət Mühafizə Xidmətinin şəxsi heyətinin yerinə yetirdiyi vəzifələrin əhatə dairəsi genişlənmişdir. 2006-cı ilin sentyabr ayında hərbi şəhərcikdə tikilərək, şəxsi heyətin istifadəsinə verilən müasir elektron hədəf qurğuları olan 25 metrlik qapalı tirin yanında cari ilin may ayında beşmərtəbəli yeni inzibati bina inşa edilərək, xidmətimizin müvafiq idarə və şöbələrinə təhvil verilmişdir. Binanın bir mərtəbəsində yeni yaradılan kompleks tədqiqatlar şöbəsi yerləşdirilmişdir. Şöbənin tərkibində ən müasir tələblərə cavab verən cihaz və avadanlıq quraşdırılmışdır.

Xidmətimiz respublikada rabitə və informasiya texnologiyaları sahəsində öz yerini tapmış ən yeni texnologiyaları tətbiq edərək, dövlət orqanları üçün telekommunikasiya sistemləri yaratmışdır. Xüsusi Dövlət Mühafizə Xidməti tərəfindən dövlət orqanları üçün operativlik və təhlükəsizlik tələblərinə cavab verən TETRA rabitə sistemi yaradılmışdır. 2007-ci ildə TETRA sistemi ixrac neft və qaz boru kəmərləri boyunca genişləndirilmişdir. Hazırda Xüsusi Dövlət Mühafizə Xidmətinin, milli təhlükəsizlik, daxili işlər, fövqəladə hallar nazirliklərinin müvafiq strukturlarının və Dövlət Gömrük Komitəsinin operativ radiorabitə əlaqəsi TETRA sistemi üzərində qurulmuşdur.

Azərbaycan Respublikasının dövlət orqanlarında informasiya təhlükəsizliyinin təmin edilməsinə dair tədbirlər haqqında Sizin Fərmanınızla üzərimizə qoyduğunuz vəzifələrin yerinə yetirilməsi məqsədi ilə Xüsusi Dövlət Mühafizə Xidməti tərəfindən təhlükəsizlik tələblərinə cavab verən “Azstatenet” internet şəbəkəsi yaradılmış, yüzdən artıq dövlət orqanı bu şəbəkəyə qoşulmuşdur. Şəbəkənin kibernetik hücumlardan müdafiə edilməsi üçün müasir avadanlıq və proqram təminatı alınmışdır və hazırda quraşdırma işləri aparılır.

2007-ci ilin sentyabr ayında xidmətimiz tərəfindən Cənubi Qafqaz ixrac qaz boru kəmərinin Azərbaycanın quru ərazisindən keçən 443 kilometrlik hissəsi mühafizəyə götürülmüşdür. Bakı-Tbilisi-Ceyhan neft və Cənubi Qafqaz boru kəmərlərinin mühafizəsinin etibarlılığını yüksəltmək məqsədi ilə yeni 9-cu şöbə - Yevlax regional şöbəsi yaradılmışdır.

Şəxsi heyətin sosial problemlərini həll etmək məqsədi ilə Bakı şəhərinin Yasamal rayonu ərazisində büdcə vəsaiti hesabına 60 mənzil, hərbi qulluqçuların şəxsi vəsaiti hesabına 72 mənzil inşa edilərək istifadəyə verilmişdir.

Möhtərəm Prezident, sadaladığım bütün bu işlər yalnız Sizin daimi diqqət və qayğınız sayəsində görülmüşdür. Sizin birbaşa göstərişinizlə 2006-cı ilin sentyabr ayından Xüsusi Dövlət Mühafizə Xidmətinə müasir tələblərə cavab verən təlim-tədris mərkəzi yaratmaq üçün Qaradağ rayonunun “Üçtəpə” ərazisində 200 hektar torpaq sahəsi və bunun üçün maliyyə vəsaiti ayrılmışdır. Keçən ilin sentyabr ayının 10-da gördüyünüz bu ərazidə tikinti-inşaat işlərinə başlanılmış və bu gün onun istismara hazır olması barədə Sizə məruzə edirəm.

Həmin tədris mərkəzi hərbi qulluqçularımızın döyüş hazırlığının təşkili və həyata keçirilməsi üçün ən müasir tələblərə cavab verən zəruri avadanlıqla təchiz olunmuşdur. Burada eyni vaxtda 280 nəfər zabit və gizirlə, 180 nəfər əsgərlə hərbi təlimlər keçirilə bilər. Bu məqsədlə təlim-tədris mərkəzində 100 metrlik və 500 metrlik atış meydanları, respublikada və ümumən regionda ilk dəfə inşa edilmiş interaktiv atıcılıq tiri, 13 tədris sinfi, kompyuter sinfi, müəllimlər üçün otaqlar, konfrans salonu istifadəyə verilmişdir. Müəllim-zabit və müddətdən artıq hərbi xidmət qulluqçularının yaşaması üçün 150 nəfərlik zabit yataqxanası, müddətli hərbi xidmət qulluqçuları üçün 190 yerlik əsgər yataqxanası inşa edilmişdir. Mərkəzdə 120 yerlik zabit və 190 yerlik əsgər yeməkxanaları, camaşırxana, hamam, qazanxana tikilmiş və digər infrastruktur obyektləri yaradılmışdır.

Təlim-tədris mərkəzində ümumhərbi hazırlıq keçmiş gənc əsgərlər hərbi andı ulu öndərimiz Heydər Əliyevin heykəli önündə qəbul edəcəklər. Qərargah binasında yaradılmış Heydər Əliyev muzeyi hərbi qulluqçularımızın dövlətə sədaqət ruhunda tərbiyə edilməsində əvəzsiz rol oynayacaqdır.

Gələcəkdə təlim-tədris mərkəzində şəxsi mühafizə və xüsusi təyinatlı bölmələrimizin xüsusi taktiki hazırlığının təşkili üzrə zolaqların, psixoloji və dağ şəraiti üçün hazırlığı üzrə qurğuların, maneəli avtomobil zolaqlarının, kinoloji xidmətin və s. bu kimi təlim və digər təyinatlı obyektlərin inşası nəzərdə tutulur.

Cənab Ali baş komandan!

Bu gün Xüsusi Dövlət Mühafizə Xidməti yüksək döyüş qabiliyyətinə malik, respublika Prezidenti tərəfindən verilən tapşırıqları hər an yerinə yetirməyə qadir olan böyük hərbi bir qurumdur. Xüsusi Dövlət Mühafizə Xidmətinin şəxsi heyəti qan hesabına əldə edilmiş müstəqilliyi uca tutaraq, dövlətçiliyin və xalq tərəfindən seçilmiş Prezidentin etibarlı mühafizəsini özünün müqəddəs vəzifəsi hesab edir. Sizi qürur hissi ilə əmin edirəm ki, xalqın və Vətənin, dövlətçiliyimizin müdafiəsində Xüsusi Dövlət Mühafizə Xidmətinin şəxsi heyəti respublika Prezidentinə etibarlı dayaq qüvvəsi olub və bundan sonra da olacaqdır.

Möhtərəm Prezident, məruzə bitdi.

                                                                             X X X

Azərbaycan Respublikasının Prezidenti, Silahlı Qüvvələrin ali baş komandanı İlham Əliyev mərasimdə çıxış etdi. 

                                                                             X X X

Sonra elan edildi ki, Azərbaycan Prezidentinin diqqət və qayğısı nəticəsində Xüsusi Dövlət Mühafizə Xidmətinin hərbi qulluqçuları üçün 2007-ci ilə 10 mərtəbəli yeni yaşayış binası tikilmişdir. Bununla da 100-dən artıq hərbi qulluqçuya öz mənzil şəraitini yaxşılaşdırmaq nəsib olmuşdur. Eyni zamanda, XDMX-nin xidmətdə xüsusi fərqlənmiş bir qrup hərbi qulluqçusu Ali baş komandan tərəfindən qiymətli hədiyyələrlə mükafatlandırılmışdır.

Prezident İlham Əliyev XDMX-nin bir qrup hərbi qulluqçusuna mənzillərin orderlərini və xidmətdə xüsusilə fərqlənənlərə qiymətli hədiyyələr təqdim etdi.

Sonra Xüsusi Dövlət Mühafizə Xidmətinin şəxsi heyəti təntənəli hərbi marşın sədaları altında tribunanın qarşısından keçdilər.

Azərbaycan Prezidenti İlham Əliyev şəxsi heyətlə sağollaşdı.