Yeddi ayda bir istehlakçı orta hesabla ayda 623,1 manat xərcləyib
Bakı, 15 avqust, AZƏRTAC
2025-ci ilin yanvar-iyul aylarında istehlakçıların tələbatlarının ödənilməsi məqsədilə satılmış malların və göstərilmiş xidmətlərin dəyəri 44,6 milyard manat olmaqla 2024-cü ilin yanvar-iyul aylarına nisbətən müqayisəli qiymətlərlə 5 faiz artıb.
Dövlət Statistika Komitəsindən AZƏRTAC-a bildirilib ki, ümumi dəyərin 78,6 faizini pərakəndə ticarət dövriyyəsi, 18,1 faizini əhaliyə göstərilmiş ödənişli xidmətlərin dəyəri, 3,3 faizini isə ictimai iaşə dövriyyəsi təşkil edib.
Qeyri-dövlət sektorunda fəaliyyət göstərən təsərrüfat subyektləri tərəfindən satılmış malların və göstərilmiş xidmətlərin dəyəri 2024-cü ilin yanvar-iyul ayları ilə müqayisədə 4,9 faiz artaraq 42,8 milyard manata bərabər olub, onun 44,1 faizi fərdi sahibkarların fəaliyyəti sayəsində formalaşıb.
Hesabat dövründə bir istehlakçı orta hesabla ayda 623,1 manat və ya 2024-cü ilin eyni dövrü ilə müqayisədə nominal ifadədə 57 manat çox vəsait xərcləyib.
Bölmənin digər xəbərləri
