Yeməkləri mikrodalğalı sobada plastik qablarda niyə qızdırmaq olmaz?
Bakı, 17 mart, AZƏRTAC
Psixiatr Fabiano və terapevt Luu xəbərdarlıq edirlər ki, qidaların mikrodalğalı sobada plastik qablarda qızdırılması demensiyanın inkişafına səbəb ola bilər. Ekspertlər demensiyanın qarşısını almaq üçün bu təcrübədən imtina etməyi məsləhət görürlər. Bu barədə “Daily Mail” məlumat verir.
Fabianonun izah etdiyinə görə, plastik qızdırılan zaman mikro və nanohissəciklər ayrılır ki, onlar zamanla beyin toxumasında yığılır. Araşdırmalara görə, neyrodegenerativ xəstəliklərdən əziyyət çəkməyən insanlarda beyində bu hissəciklərin miqdarı təxminən bir xörək qaşığı olduğu halda, demensiyalı xəstələrdə bu rəqəm 3-5 dəfə çoxdur.
AZƏRTAC xəbər verir ki, üstəlik, mikroplastik bağırsaq mikroflorasına, eləcə də böyrək, qaraciyər, ürək və qan damarlarının fəaliyyətinə zərərli təsir göstərir, xərçəng, ürək-damar xəstəliklərinin, trombozun yaranma ehtimalını artırır.
Luu vurğulayıb ki, plastik qabların qızdırılması həm qidaları zərərli hissəciklərlə çirkləndirir, həm də onların atmosferə buraxılmasına gətirib çıxarır. Onun fikrincə, qida saxlamaq üçün metal və ya şüşə qablardan istifadə demensiya və digər xəstəliklər riskini azaltmağa imkan verir.
Bölmənin digər xəbərləri
