Yeni yol Astananı beynəlxalq nəqliyyat dəhlizi ilə birləşdirəcək
Astana, 3 aprel, AZƏRTAC
Qazaxıstanın Kustanay vilayətində Astananı Arkalıq, Turqay və İrgizdən keçməklə Trans-Xəzər Beynəlxalq Nəqliyyat Marşrutu (TITR) ilə birləşdirəcək yolun tikintisi planlaşdırılır. Bununla yanaşı, Arkalıqda hava limanının bərpası da nəzərdə tutulub.
AZƏRTAC Qazaxıstan Baş nazirinin rəsmi informasiya resursuna istinadla xəbər verir ki, yeni “Mərkəz-Qərb” marşrutu Akmola, Kustanay və Aktobe vilayətlərinin ucqar rayonlarının nəqliyyat problemlərini həll edəcək, məsafə və səyahət vaxtı azalacaq.
Hazırda Astanadan qərb bölgələrinə uzanan marşrut 1438 kilometrdir və Astana - Atbasar - Yeşil - Kustanay - Karabutak – İrgiz istiqamətindədir. Janteke, Egindikol, Arkalyk və Torqaydan keçəcək yeni magistral yol bu marşrutu 865 kilometrə qədər azaldacaq. Bu, mövcud yolun xeyli qısalması deməkdir.
Eyni zamanda, tranzit potensialı da xeyli artacaq. Magistral Qazaxıstanın mərkəzi rayonlarından Trans-Xəzər marşrutuna çıxışı təmin edəcək, Astananın mövqeyini möhkəmləndirəcək və beynəlxalq daşımalarda onun rəqabət qabiliyyətini artıracaq.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
