Zapolyarye azərbaycanlıları qəlbən Bakıdadırlar...
Bakı, 4 iyul (AZƏRTAC). Sabah Bakıda Dünya azərbaycanlılarının üçüncü qurultayı işə başlayır. Qurultayda 600-ə yaxın nümayəndə və dünyanın 42 ölkəsindən 200-dən çox qonaq iştirak edəcəkdir.
Rusiya bu qurultaya ən böyük (155 nəfərdən ibarət) nümayəndə heyəti göndərir. Onlardan üç nəfəri Uzaq Şimalda və Kola yarımadasında yaşayan azərbaycanlılardır.
Tale elə gətirmişdir ki, Rusiyanın ən böyük Azərbaycan diasporlarından biri Murmansk vilayətində yaşayır və işləyir. Bir qədər qəribə səslənsə də, arktik Murmansk ilə günəşli Bakı arasında ortaq cəhətlər çoxdur. Hər ikisi iri liman şəhərləridir. Buna görə də vaxtı ilə liman təsərrüfatlarında çalışan azərbaycanlı mütəxəssislər - gəmiçi və mexaniklər Murmansk ticarət və balıq ovu limanlarını, buradakı nəqliyyat və balıq ovu donanmalarını yaratmaq və mənimsəmək üçün nə vaxtsa Murmanska gəlmişlər.
Sonralar, Murmansk Arktikada neft və qaz hasilatı mərkəzinə çevriləndə azərbaycanlı geoloqların, neft və qaz hasil edən mütəxəssislərin böyük bir dəstəsi buraya üz tutmuşdur. Soydaşlarımızın çoxu öz tarixi vətənlərində texniki ali və orta ixtisas məktəblərini bitirəndən sonra Uzaq Şimalın mədənçıxarma sənayesində, Kola yarımadasındakı apatit, dəmir və mis-nikel filizi çıxarılan müəssisələrdə işləməyə başlamışlar.
Rusiyanın qüdrətli Şimal Donanmasının zabitləri arasında da hələ sovet dövründə Bakıdakı hərbi məktəbləri bitirəndən sonra təyinat üzrə şimala göndərilmiş azərbaycanlılar vardır.
Təbii ki, buraya gələn azərbaycanlı mütəxəssislər öz ailələrini də gətirmişlər. Ona görə də təəccüblü deyildir ki, bu gün Murmansk vilayətində 25 minlik Azərbaycan diasporu vardır. Elə bu səbəbdən, Murmanskdan Bakıya, Dünya Azərbaycanlılarının Qurultayına göndərilən nümayəndə heyətini böyük hərarətlə yola salmış, onlara xüsusi ümid bəsləndiyini bildirmişlər.
Murmansk vilayət qubernatoru Dmitri Dmitreyenko Azərbaycan diasporu ilə daim sıx əlaqə saxlayır. Murmansk Vilayət administrasiyası bir nəfər azərbaycanlını Rusiyanın bu Zapolyarye regionunun inkişafı ilə əlaqədar ən ümdə məsələlərin müzakirə olunduğu vilayət İctimai Palatasına üzv təyin etmişdir. Diyar rəhbərliyi çox müdrik bir qərar seçmişdir: burada yaşayan bütün xalqların ənənələrinə və tarixi dəyərlərə dərin hörmətlə yanaşmaq lazımdır.
2004-cü ildə Zapolyaryedə Ümumrusiya Azərbaycanlılar Konqresinin Murmansk bölməsini yaratmaq qərara alınmışdır. Sonralar Rusiyanın Azərbaycanlı Gənclər Təşkilatının (RAGT) Murmansk bölməsi də yaradılmışdır. Bu bölmənin fəaliyyətinə ÜAK-ın vilayət bölməsi nəzarət edir.
Zapolyarye azərbaycanlıları öz tarixi vətənləri ilə bu və ya digər şəkildə əlaqəli olan hər bir hadisəni həssaslıqla qarşılayır, bütün milli bayramları böyük ruh yüksəkliyi ilə qeyd edirlər.
Azərbaycanlı jurnalist Əlihüseyn Şükürov AZƏRTAC-a bildirmişdir ki, Murmansk Vilayət hökuməti və İctimai Palata Azərbaycan diasporunun fəaliyyətini geniş işıqlandıran, millətlərarası əməkdaşlığı dəstəkləyən Azərbaycan Dövlət Teleqraf Agentliyinin (AZƏRTAC) işini çox yüksək qiymətləndirir. Rusiyanın Murmansk Vilayət Administrasiyasının mətbuat xidmətinin əməkdaşları qeyd edirlər ki, respublika KİV-lərində AZƏRTAC-dan başqa heç yerdə “Diaspor” kimi aktual bölmə yoxdur. Öz soydaşlarına informasiya məkanı təqdim edən də məhz AZƏRTAC-dır.
Murmanskda yaşayan azərbaycanlılar arasında hörmət və nüfuz sahibi olanlar çoxdur. Rusiya Zapolyaryesinin Azərbaycan diasporunun bütün nümayəndələri - alimlər, professorlar, mühəndislər, həkimlər, geoloq və neftçilər, jurnalistlər, hərbçilər, polis əməkdaşları, hüquqşünaslar, sahibkarlar Dünya azərbaycanlılarının üçüncü qurultayının işinə uğurlar, sülh və dostluq ab-havası yaradılmasına yönəlmiş səmərəli qərarlar qəbul edilməsini arzulayırlar.
Bölmənin digər xəbərləri
