Zəngəzur Milli Parkının ərazisində 110 flora və 33 fauna növü qorunur
Bakı, 16 iyun, AZƏRTAC
Biomüxtəlifliyin qorunmasının ən mühüm yollarından biri də onların təbiət ərazilərində mühafizəsidir. 2009-cu ilə qədər Naxçıvan Muxtar Respublikasının ərazisindən yalnız 9.74 faizi qorunurdu, bu da 52 min 257 hektar sahə demək idi. Sonrakı dövrlərdə dövlətimizin təbiətə, təbii sərvətlərə olan qayğısı nəticəsində qorunan ərazi genişləndirilərək 148 min 695,6 hektar təşkil edib. Bu da ümumi ərazinin 27 faizi deməkdir. Qafqaz regionunda mövcud olan göstəricilərdən xeyli üstündür. Hazırda muxtar respublika ərazisində bir milli park, 3 dövlət təbiət yasaqlığı fəaliyyət göstərir. Bunlar içərisində ən mühüm qorunan ərazilərdən biri akademik Həsən Əliyev adına Zəngəzur Milli Parkıdır. Zəngəzur Milli Parkı Azərbaycan Respublikası Prezidentinin Sərəncamı ilə 2003-cü il iyunun 16-da yaradılıb. Əvvəlcə Həsən Əliyev adına Ordubad Milli Parkı adlandırılıb. Sonrakı dövrlərdə təbiəti mühafizə işinin effektivliyini və idaredilməsinin təkmilləşdirilməsi üçün Prezident İlham Əliyevin 2009-cu il 25 noyabr Sərəncamı milli parkın ərazisi daha da genişlənidirilərək 42 min 797,4 hektara çatdırılıb və akademik Həsən Əliyev adına Zəngəzur Milli Parkı adlandırılıb. Akademik Həsən Əliyev adına Zəngəzur Milli Parkının yaradılmasında əsas məqsəd nadir və məhv olmaq təhlükəsi altında olan bitkilərin mühafizəsi, endemik növlərin qorunub saxlanılması, əhalinin ekoloji cəhətdən maarifləndirilməsi və turizm üçün əlverişli şəraitin yaradılmasıdır.
Bunu Elm və Təhsil Nazirliyinin Naxçıvan bölməsinin Bioresurslar İnstitutunun elmi katibi, biologiya elmləri doktoru Ənvər İbrahimov Zəngəzur Milli Parkının 20 illiyi münasibətilə AZƏRTAC-a verdiyi müsahibədə deyib.
“Hazırda Zəngəzur Milli Parkının ərazisində 110 nadir və məhv olmaq təhlükəsi altında olan flora və 33 fauna növü qorunur. Onların əksəriyyəti Naxçıvan Muxtar Respublikasının “Qırımızı kitab”ının birinci və ikinci nəşrinə, o cümlədən Azərbaycan Respublikasının “Qırmızı kitab”ının üçüncü nəşrinə salınıb. Ümumiyyətlə milli parkın yaradılması muxtar respublikanın təbiətinin tanınması və qorunmasında mühüm əhəmiyyət kəsb edir. Bura, həmçinin tarixi abidələrin, Gəmiqaya ərazisində qaya rəsmlərinin mühafizəsi baxımından da vacib rol oynayır. Həmin milli parkın yaradılması Azərbaycan Respublikasında xüsusi mühafizə olunan təbiət əraziləri şəbəkəsinin genişlənməsində mühüm addım oldu. Milli parkın daha səmərəli fəaliyyət göstərməsi məqsədilə qarşıda duran problem və onların həlli yollarına xüsusi diqqət yetirilir. Belə ki, ərazinin təbii coğrafi xüsusiyyətlərinin, flora və faunanın, tarixi memarlıq abidələrinin, təbii mühitin qorunub saxlanılması, əvvəllər mövcud olan, lakin sonradan məhv olmuş, sayca azalmış bitkilərin heyvan və quşların bərpası, aparılan tədqiqat işləri əsasında təbii sərvətlərdən səmərəli istifadənin təşkillinin elmi-metodik konsepsiyasının hazırlanması, mövcud rekreasiya imkanlarından istifadənin təşkili və turizmin inkişafı, infrastruktur şəbəkələrinin yaradılması məqsədi üçün elmi araşdırmaların aparılması, milli parkın mövcud imkanlarının muxtar respublikanın sosial-iqtisadi inkişafına yönəldilməsi, regionun təbliği, tanınması, bu sahədə beynəlxalq elmi əlaqələrin yaradılması və genişləndirilməsi kimi problemlərin həlli yollarına diqqət yönəldilib. Ümummilli Liderin dediyi kimi, təbiətin ölkəmizə bəxş etdiyi zəngin sərvətlərə xüsusi qayğı ilə yanaşmaq, belə misilsiz xəzinələri bəşəriyyətin gələcəyi naminə qorumaq üzərimizə düşən əsas vəzifələrdən biridir”, - deyə Ə.İbrahimov bildirib.
Bölmənin digər xəbərləri
