MƏDƏNİYYƏT


Pierluici Rucciero: Azərbaycan məni həmişə özünə cəlb edib VİDEO

Roma, 20 dekabr, AZƏRTAC

Azərbaycanın böyük klassiklərindən Üzeyir Hacıbəyli, Fikrət Əmirov, Qara Qarayev və digər görkəmli bəstəkarlarınızın əsərləri ilə tanışam. Onlar Azərbaycanın operasını və klassik musiqisinin bənzərsiz incilərini. Onların bəzi əsərlərini ifa etmək imkanım olub.

Bu sözləri italyan maestro violonçel ustası Pierluici Rucciero AZƏRTAC-ın xüsusi müxbirinə məxsusi müsahibəsində deyib.

Azərbaycanın tarixi və adət-ənənələri haqqında məlumatlı olduğunu söyləyən maestro ölkəmizin müstəqillik qazandıqdan sonra əldə etdiyi inkişaf və tərəqqidən danışıb. “Azərbaycan bir çox mötəbər beynəlxalq tədbirlərin keçirilməsində zəngin təcrübəyə malikdir. Azərbaycan bir çox aspektlərdən Avropaya yaxın bir ölkədir. Bu yaxınlığın tarixi və mədəni səbəbləri var. Belə ki, ölkəniz Avropa Şurasının üzvüdür. Ölkənizin tarixinə, adət-ənənələrinə, milli musiqisinə marağım və həvəsim olduğu üçün Azərbaycan məni həmişə özünə cəlb edib”, - deyə Pierluici Rucciero vurğulayıb.

Azərbaycanın musiqisi və muğamı haqqında fikirlərini bölüşən violonçel ustası deyib: “Bənzərsiz musiqi janrı olan muğam UNESCO tərəfindən Bəşəriyyətin Qeyri-Maddi İrsinin şah əsəri elan olunub. Təbii ki, məni muğamın ecazkar melodiyaları və improvizasiyaları valeh edir. 2015-ci ildə Bakıda Beynəlxalq Muğam Mərkəzində violonçeldə "Sarı gəlin" xalq mahnısını ifa etmək şərəfinə nail oldum. Azərbaycanın İtaliyadakı səfirliyi ilə reallaşdırdığımız ortaq layihələr çərçivəsində ölkənizin musiqi tarixi haqqında məlumatlarımı dərinləşdirdiyimi xüsusən qeyd etmək istərdim. 2014-cü ildən başlayaraq mənə Azərbaycanın görkəmli və istedadlı sənətkarlar ilə əməkdaşlıq etmək nəsib olub. Üzeyir Hacıbəyli adına Bakı Musiqi Akademiyasına qonaq kimi dəvət edilərək paytaxtınızın musiqi gerçəkliyi ilə daha yaxından tanış olmuşam. Mükəmməl instrumental məktəb və bir çox gənc, istedadlı musiqiçilər ölkənizi zəngin mədəniyyət mərkəzinə çevirir. İstedadlı pianoçular Yeganə Axundova, Kəmalə Əlizadə, Səidə Tağızadə, skripkaçı Zəhra Quliyeva, mahir tarzən Sahib Paşazadə ilə birgə duet ifa etmişəm. Bundan başqa, İtaliyanın “RAİ” milli radiosunda şəxsən tanıdığım bəstəkar və Musiqi Akademiyasının rektoru Fərhad Bədəlbəylinin, bəstəkarlar Sevda İbrahimova, Fidan Qasımova və Firəngiz Əlizadənin mahnılarını səsləndirmişəm”.

Azərbaycanın İtaliyadakı səfirliyi tərəfindən təşkil edilmiş mədəni tədbirlərin kifayət qədər peşəkar səviyyədə hazırlandığını söyləyən musiqiçi 2016-2018-ci illərdə keçirilmiş üç mötəbər tədbirin təşkilindən zövq aldığını söyləyib. Bildirib ki, Bakı Musiqi Akademiyası ilə Florensiya Konservatoriyası arasında əldə etdiyi üçillik əməkdaşlıqdan olduqca qürur duyur.

O deyib: “2016-cı ilin oktyabrında Romada Azərbaycan səfirliyinin təşkili ilə “Kançellariya” sarayında keçirilən konsertimizin müvəffəqiyyəti gözlənildiyindən də artıq oldu. 2017-ci ilin fevralında Azərbaycanın İtaliyadakı səfirliyinin dəstəyi ilə Xocalı soyqırımının 25-ci ildönümünə həsr olunmuş “10 hekayə. Bunlar həqiqət ola bilərdi...” adlı ədəbi-musiqili tamaşa təşkil etdim. Romanın tarixi “Palazzo Brancaccio” sarayında baş tutan tədbirə İtaliyanın dövlət qurumlarının nümayəndələri, parlament üzvləri, bu ölkədə akkreditə olunan diplomatik korpusun təmsilçiləri, ölkənin mədəniyyət, elm, akademik dairələrinin tanınmış şəxsləri, jurnalistlər də daxil olmaqla ümumilikdə 250-dən çox tamaşaçı qatılmışdır”.

Maestro qeyd edib ki, bu ilin oktyabrın 14-də İtaliya Respublikası Prezidentinin Kuirinale sarayının “Kapella Paolina” zalında Azərbaycan, italyan və macar musiqiçilərindən ibarət konsert proqramı təqdim olunub. Rəhbərlik etdiyim Belcan-Tar ansamblı və Xalq artisti Mənsum İbrahimovun “Qarabağ” muğam ansamblının müşayiəti ilə Azərbaycanın klassik musiqi nümunələri, muğam və xalq mahnılarından ibarət konsert ölkənin məşhur “Rai Radio 3” ictimai radiosu ilə canlı yayımlanıb. Bu konsert Azərbaycanın İtaliyadakı səfirliyi tərəfindən təşkil edilib.

Mədəni əlaqələrin hazırkı vəziyyətindən söz açan ifaçı deyib ki, son üç ildə iki ölkənin mədəniyyət mübadiləsi Azərbaycanın İtaliyadakı səfirliyinin dəstəyi sayəsində əhəmiyyətli dərəcədə genişlənib. İtaliyada daha çox Azərbaycan ifaçıları təqdir edilir.

Azərbaycanda konsert proqramı ilə çıxış etmək arzusunda olduğunu söyləyən Pierluici Rucciero təəssüflə bildirib ki, Bakıda və ölkəmizin digər şəhərlərində çox az çıxış edib: “Mən Azərbaycanın vurğunuyam və inanıram ki, bu gözəl ölkədə tezliklə geniş konsert proqramları ilə çıxış edəcəyəm”.

Asiman Əsədov

AZƏRTAC-ın xüsusi müxbiri

Roma

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.