“15 İyun – Milli Qurtuluş Günü” sadəcə təqvim bayramı deyil...
Bakı, 14 iyun, AZƏRTAC
Ulu Öndər Heydər Əliyevin xilaskarlıq missiyası ilə Azərbaycana hakimiyyətə qayıdışının 30-cu ildönümü münasibətilə Azərbaycan Ordusunun Təlim və Tədris Mərkəzinin “Heydər Əliyev muzey-lektoriyası”nda tədbir keçirilib.
Bu barədə AZƏRTAC-a Müdafiə Nazirliyinin mətbuat xidmətindən məlumat verilib.
Bildirilib ki, əvvəlcə muzey-lektoriyanın ekspozisiyasında nümayiş olunan foto və sənədlər barədə tədbir iştirakçılarına ətraflı məlumat verilib. Burada sərgilənən hər bir foto və sənəd görkəmli siyasi və dövlət xadimi, müasir Azərbaycan Ordusunun qurucusu Ulu Öndər Heydər Əliyevin zəngin ömür yolunun müxtəlif anlarını əks etdirir.
Dəyirmi masada çıxış edən polkovnik Abdulla Qurbani qeyd edib ki, üçüncü ildir xalqımız və ordumuzun şəxsi heyətinin qələbə əhvali-ruhiyyəsi ilə qeyd etdiyi 15 İyun - Milli Qurtuluş Günü Azərbaycanın iqtisadi, siyasi, mədəni yüksəlişinə qədəm qoyduğu, ölkəmizin ordu quruculuğunda yeni mərhələnin başlandığı gündür. Müstəqilliyini yenicə bərpa etmiş respublikamızda xalqın vətəndaş müharibəsi təhlükəsindən, dövlətimizin çevriliş cəhdlərindən xilas edildiyi gündür. 15 İyun - Milli Qurtuluş Günü xalqımız üçün sadəcə təqvim bayramı deyil, eyni zamanda, böyük ictimai-siyasi və tarixi əhəmiyyətə malik bayramdır. Bu əlamətdar gün Azərbaycan Ordusunun birlik, birləşmə, hərbi hissə və xüsusi təyinatlı təhsil müəssisələrində də coşqu ilə qeyd edilir.
İdeoloji İş və Mənəvi-Psixoloji Təminat İdarəsi rəisinin vəzifəsini icra edən polkovnik Elşad Əbilov da bu şanlı tarixin memarının Azərbaycanın müstəqilliyinin qorunub saxlanılmasında, möhkəmləndirilməsində, inkişafında müstəsna rol oynayan, daim xalqına arxalanan və xalqımıza Müzəffər Ali Baş Komandan, Prezident İlham Əliyev kimi görkəmli şəxsiyyəti bəxş edən Ümummilli Lider Heydər Əliyevin olduğundan qürurla söhbət açıb: “1991-ci ilin oktyabrında Azərbaycan öz dövlət müstəqilliyini bərpa etsə də, ölkədə yaranan gərgin vəziyyət dövlətimizin müstəqilliyini təhlükə altında qoyurdu. Ölkədə fəaliyyət göstərən bəzi silahlı birləşmələrin yol verdikləri başıpozuq hərəkətlər ölkəmizin daxilində qardaş qırğını və vətəndaş müharibəsinə zəmin yaradırdı. Ayrı-ayrı bölgələrdə separatçılıq və parçalanma meyillərinin baş qaldırması Azərbaycanın bir dövlət kimi varlığına birdəfəlik son qoyulması planını tam gücü ilə işə salmışdı. Həmin dövrdə əhalinin böyük təbəqəsini əhatə edən vətənpərvər insanlar yaranmış ağır, mürəkkəb vəziyyətdən çıxış yolunu Naxçıvan Ali Məclisinin sədri, görkəmli dövlət xadimi Heydər Əliyevin Azərbaycana rəhbərlik etməsində görür və bu məqsədlə müxtəlif təşəbbüslərlə çıxış edirdilər. 1993-cü ilin iyunun 4-də, Azərbaycan vətəndaş müharibəsi təhlükəsi ilə üz-üzə qalanda AXC-Müsavat cütlüyü həm xalqın tələbini, həm də özlərinin acınacaqlı aqibətlərini nəzərə alaraq, Heydər Əliyevi Bakıya dəvət etmək məcburiyyətində qaldılar”.
Həmin günlərdə Ulu Öndərə müraciət edən məşhur “91-lər”in ən gənc nümayəndəsi olan professor Vüqar Rəhimzadə isə bildirib ki, Azərbaycan Parlamentinin 1993-cü il iyunun 15-də keçirilmiş iclasında Heydər Əliyev Azərbaycan Respublikası Ali Sovetinin sədri seçildi və bu hadisə xalqımızın tarixinə “Milli Qurtuluş Günü” kimi daxil oldu. Milli Qurtuluş Günündən daha parlaq gələcəyə, möhtəşəm Zəfərə doğru gedən yolumuzun başlanğıcı da məhz həmin günlərdə qoyulurdu.
Respublika Veteranlar Təşkilatı sədrinin müavini Cəlil Xəlilov da Heydər Əliyev və Azərbaycanda təhlükəsizlik məsələləri, Ulu Öndərin ordu quruculuğunda, Sərhəd Qoşunlarının formalaşmasında, möhkəmlənməsində müstəsna xidmətlərindən, eləcə də veteranlara, müharibə iştirakçılarına göstərilən diqqət və qayğıdan danışıb. Bu ənənələrin Prezident, Müzəffər Ali Baş Komandan İlham Əliyev tərəfindən bu gün də uğurla davam etdirildiyini vurğulayıb.
Dəyirmi masada zabitlərdən Habil Talıbov, Mehman Kərimov, Emil İbrahimov, Elvin Əzizov, Rafət Əliyev, “Ehtiyat zabit hazırlığı kursu”nun dinləyicilərindən İlqar Balakişiyev, Məhəmməd Emin Şahbazov və başqaları çıxış edərək Ulu Öndərin Azərbaycan xalqı və dövləti qarşısında xidmətləri barədə fikirlərini söyləyib. Bundan sonra da Heydər Əliyev ideyalarına sadiq qalaraq Müzəffər Ali Baş Komandan İlham Əliyevin rəhbərliyi ilə Vətənə, xalqa, dövlətə sədaqətlə xidmət edəcəklərini bir daha bəyan ediblər.
Sonda Azərbaycan Ordusunun Sənədli və Tədris Filmləri Mərkəzinin hazırladığı “Milli Qurtuluşdan Zəfərə doğru” adlı videoçarx nümayiş etdirilib.
Bölmənin digər xəbərləri
