“2013-cü il üçün Azərbaycanın əfsanələr paytaxtı” elan olunmuş Xaçmaza mediatur təşkil edilmişdir
Xaçmaz, 24 dekabr (AZƏRTAC). “2013-cü il üçün Azərbaycanın əfsanələr paytaxtı” elan olunmuş Xaçmaz rayonuna Mədəniyyət və Turizm Nazirliyinin təşkilatçılığı ilə mediatur təşkil edilmişdir.
AZƏRTAC xəbər verir ki, respublikanın bir sıra media qurumları, televiziya kanalları təmsilçilərinin, həmçinin Mədəniyyət və Turizm Nazirliyinin məsul əməkdaşlarının iştirak etdikləri mediaturun məqsədi “2013-cü il üçün Azərbaycanın əfsanələr paytaxtı”nda həyata keçirilən tədbirlərlə tanışlıq olmuşdur.
Tədbir iştirakçıları Xaçmaz şəhərində açıq səma altında qurulmuş Şəxsiyyətlər Muzeyində qarşılanmışlar. Yerli musiqiçilərin və rəqs qruplarının ifasında konsert təqdim olunmuşdur.
Rayon tarix-diyarşünaslıq muzeyində mediatur iştirakçılarına buradakı çoxəsrlik tarixə malik eksponatlar haqqında ətraflı məlumat verilmişdir. Qonaqlar, həmçinin yerli rəssamların əl işlərindən ibarət sərgi ilə də tanış olmuşlar.
Tarix-diyarşünaslıq muzeyində təşkil olunmuş mətbuat konfransında nazirliyin mədəniyyət siyasəti şöbəsinin müdiri Fikrət Babayev məlumat vermişdir ki, yaradıcılıq paytaxtlarının elan edilməsinin əsas məqsədi ölkəmizin qeyri-maddi mədəni irsinin qorunması və dəstəklənməsindən ibarətdir. Layihə çərçivəsində folklor ustaları və kollektivlərinin, milli adət-ənənələrin beynəlxalq səviyyədə tanıdılması istiqamətində xeyli işlər görülmüşdür.
Tədbirdə Xaçmazda həyata keçirilmiş mədəni tədbirlərdən geniş söhbət açılmış, burada Rusiya Federasiyasının Dağıstan Respublikasının məşhur “Ləzginka” rəqs qrupunun konsertinin, Belarus Mədəniyyət Günlərinin keçirildiyi diqqətə çatdırılmışdır.
Mediaturun iştirakçıları rayonun digər görməli yerləri və tarixi abidələri ilə də tanış olmuşlar.
Bölmənin digər xəbərləri
