20 Yanvar faciəsini unutmaq olmaz
Bakı, 20 yanvar (AZƏRTAC). Artıq 21 ildir ki, xalqımız bu günü ümumxalq hüzn günü kimi böyük izdihamla, şəhidlərimizin ruhuna layiq bir şəkildə qeyd edir. Havanın bir qədər çiskinli olmasına baxmayaraq, 20 Yanvar şəhidlərini anmaq, yad etmək, onlara öz vətəndaşlıq borcunu qismən də olsa ödəmək üçün müqəddəs məkana - Şəhidlər xiyabanına üz tutanların ardı-arası kəsilmir.
Bu insan selinə qoşulub, müqəddəs məkana doğru üz tutanların sırasında məktəblilər də az deyildir. Onlar mənsub olduqları xalqın böyüklüyünü, müdrikliyini bir daha gözləri ilə görmək üçün buraya gəlmişlər.
Binəqədi rayonundakı 30 nömrəli məktəbin 7-ci sinif şagirdləri - Qorxmaz Əlili, İbad Cəlilzadə, Vüsal Həsənov və Nəcəf Məmmədov faciə qurbanları haqqında müəllimlərindən eşitdiklərini, kitablardan oxuduqlarını deyirlər. Bildirirlər ki, 20 Yanvar faciəsini unutmaq olmaz. Unutsaq azadlığımızın, müstəqilliyimizin qədrini bilmərik. Dünyada isə azadlıqdan, müstəqillikdən şirin şey yoxdur. 20 Yanvar təkcə faciə və hüzn günümüz kimi qiymətləndirilməməlidir. Bu hadisə həm də xalqımızın müstəqillik, azadlıq, demokratiya, ərazi bütövlüyü uğrunda apardığı mübarizəsinin, dünyanı heyrətə gətirən mərdliyinin, igidlik və haqsevərliyinin böyük təntənəsidir.
Bölmənin digər xəbərləri
