Rekord həcmdə biyan balı istehsal olunub – Bal süzümü başladı FOTO VİDEO
Saatlı, 7 iyul, Aydın Yavərzadə, AZƏRTAC
Saatlıda arıçılıq təsərrüfatında biyan balının süzümünə başlanılıb. Bitki örtüyünün sıx olması hər arı yeşiyindən 30-40 kiloqram məhsul götürməyə imkan verir. İldə bir dəfə bal süzülən arıçılıq təsərrüfatından 1500 kiloqramdan çox məhsul əldə olunması gözlənilir.
AZƏRTAC-ın bölgə müxbiri xəbər verir ki, Saatlı rayonunun Smadakənd kəndində yerləşən arıçılıq təsərrüfatının 70 hektar biyan sahəsi var. Burada 70-ə yaxın arı ailəsi saxlanılır.
Təsərrüfat sahibi Ehtiram Məmmədov bildirib ki, bu il mövsüm arıçılar üçün elə də ürəkaçan başlamamışdı. Lakin aprel ayından hər şey yaxşılığa doğru dəyişdi. Həm hava şəraiti, həm də biyan sahələri arıların işləməsi üçün əlverişli oldu.
“Fevral ayı isti keçdiyinə görə arılar qış fəslində oyandı və işləməyə başladı. Lakin sonradan mart ayının sonuna kimi havalar soyuq keçdi. Bu, arıların işinə də mənfi təsir göstərdi və arılar yeşiklərdə qalaraq öz məhsullarını yedilər. Təkcə bizim təsərrüfatda 170-dən artıq arı ailəsi var, onlardan 24-ü aclıqdan tələf oldu. Sonra arılara ehtiyat üçün saxlanılan baldan verdik, vəziyyət yaxşılaşdı. Ümumiyyətlə fevral-mart aylarında hava dəyişkənliyi arıçılara ciddi problemlər yaratdı. Lakin aprel ayında yağan yağışlar bitki örtüyünün zənginləşməsinə, inkişafına səbəb oldu. Biyan sahələri də yaxşı çiçəklədi”, - deyə Ehtiram Məmmədov əlavə edib.
Həmsöhbətimiz 20 ildir arıçılıqla məşğuldur. Deyir ki, hələ builki kimi zəngin, inkişaf etmiş bitki örtüyünə və arının məhsuldarlığına rast gəlməyib. O, bu il ton yarımdan çox məhsul götürəcəyini planlaşdırır.
Arıçılıq təsərrüfatının özünəməxsusluğundan söhbət açan Ehtiram Məmmədov təsərrüfatının əsas özəlliyinin 70 hektarlıq biyan sahəsində yerləşməsində olduğunu vurğulayıb. Ona görə də onun arıçılıq təsərrüfatını tanıyanlar az deyil. Hətta buraya Yaponiyadan gələnlər və Saatlı balını alaraq Uzaq Şərqə aparanlar da az olmayıb.
Arıçının köməkçiləri arasında nəvələri də var. Hər il yay fəslində təsərrüfata üz tutan yeniyetmələr arıçılığın sirlərinə yiyələnirlər. Ehtiram kişinin nəvəsi Nizami hər yay babasına kömək etdiyini, bununla yanaşı, yay istirahətini də səmərəli keçirdiyini söyləyir: “İyul ayında buraya gəlib biyan balı süzürük. Mövsüm başa çatdıqdan sonra isə arı ailələrini payız və qış mövsümünə hazırlamaq üçün lazımi işləri yerinə yetiririk".
Ayan Məmmədli də biyan balının faydaları haqqında məlumatlıdır. Deyir ki, biyan balı ən yaxşı baldır, dadı da fərqlidir. Faydalarının çox olması ilə fərqlənir.
Biyan balının faydalarından danışan digər arıçı Ağamir Ağayevin sözlərinə görə, bu il biyan bitkisi yaxşı inkişaf etdiyindən balın 99 faizi demək olar ki, biyan bitkisinin nektarından ibarətdir. Hətta şanda bal o qədər qatıdır ki, onu süzərkən süzgəcdən çətinliklə keçir. Biyan balının qatılığı, rəngi onun keyfiyyətindən xəbər verir.
Bu balın faydasından danışan arıçı bildirib ki, biyan balı güclü müalicəvi təsirə malikdir. Biyanın nektarında olan aponin və qliserizinxam maddələri sayəsində onunla qidalanan arıların verdiyi bal müalicəvi təsirə malikdir. Onun müalicəvi xüsusiyyətlərini isə saymaqla bitirmək olmaz: antibakterialdır, immuniteti gücləndirir, sinəyumşaldıcı və bəlğəmgətiricidir, bronxları təmizləyir, soyuqdəymə və qrip kimi xəstəliklərdə müsbət təsir göstərir, boğaz ağrılarını götürür, qan azlığı, dalaq çatışmazlığını müalicə edir. Həmçinin beyində qan dövranını yaxşılaşdırır, həzmi asanlaşdırır, qəbizliyi aradan qaldırır, qaraciyəri təmizləyir və s.
Təsərrüfatda balla yanaşı, propolis, arı südü, çiçək tozu kimi arı məhsulları da istehsal edilir, həmçinin ana arı yetişdirilir.
Bölmənin digər xəbərləri
