“ARB Günəş” 10 yaşında - Azərbaycanın ilk və tək uşaq televiziyasından REPORTAJ VİDEO
Xaçmaz, 1 aprel, Elxan Yusifli, AZƏRTAC
Bu gün Azərbaycanın ilk və tək uşaq televiziya kanalı olan “ARB Günəş”in 10 yaşı tamam olur.
AZƏRTAC-ın bölgə müxbiri xəbər verir ki, 2015-ci il aprelin 1-də fəaliyyətə başlayan telekanal efir vaxtını bütünlüklə uşaqlara həsr edir.
“ARB Günəş” azyaşlı izləyicilərə Azərbaycan dilində cizgi və animasiya filmləri göstərir.
Ötən müddət ərzində "ARB Günəş"in istehsalı olan "Biz gələcəyik", "Xəbərdar ol”, “Bizim həyət”, “Mərcangildə”, “Günəşin nağılı”, “Çərpələng”, “Yaşıl ev”, “Hava necə olacaq?” və başqa bu kimi maraqlı verilişlər balaca tamaşaçıların böyük rəğbətini qazanıb. Eləcə də “ARB Media Qrup”a daxil olan digər telekanallarla, Elm və Təhsil Nazirliyinin nəzdində fəaliyyət göstərən Təhsil TV ilə birgə əməkdaşlıq nəticəsində ərsəyə gələn “Dostlar”, “Qiraətçi” və “Məktəblilər üçün oxu” verilişləri, Kənd Təsərrüfatı Nazirliyi ilə birgə əməkdaşlıq çərçivəsində hazırlanan “Təbiət və biz” verilişləri uşaqlar tərəfindən sevilərək izlənilib.
Televiziyanın efirində yayımlanan tərbiyəvi və maarifləndirici proqramlar vasitəsilə uşaqlara davranış qaydaları, təbiət və heyvanlar aləmi haqqında biliklər, səlis yazmaq, oxumaq, sağlam həyat vərdişləri öyrədilir.
Həmsöhbətimiz Əvəz Qubatov “ARB Günəş”də dublyaj aktyoru kimi çalışır. Eyni zamanda, televiziyanın iki reytinqli uşaq proqramında aparıcı personajların səsləndirilməsini həyata keçirir. “Mən 10 ildir “ARB Günəş”də işləyirəm. Dublyaj aktyoruyam. Eyni zamanda, “Hava necə olacaq?” proqramında Toplan, “Biləndərdən öyrən” verilişində isə Biləndər obrazını canlandırıram. Toplan ardıcıl 5 mövsümdür ki, hər gün uşaq televiziyasının tamaşaçılarına özünəməxsus şəkildə hava haqqında məlumatı təqdim edir. Uşaqlar tərəfindən çox sevilən obrazdır. “Biləndərdən öyrən” proqramında isə Biləndər sevimli aktrisamız Günəş Tegin ilə birlikdə aparıcılıq edir. Bu proqramda uşaqlara davranış qaydaları, sağlam həyat vərdişləri aşılanır”,-deyə Əvəz Qubatov söyləyib.
Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi ilə əlaqədar cari televiziya mövsümündən başlayaraq “ARB Günəş”də “Yaşıl ev” adlı proqram təqdim olunur. Proqramın aparıcısı İntizar Qurbanova bildirir ki, bu verilişdə uşaqlara təbiəti qorumaq, təmiz ətraf mühit haqqında maarifləndirici və əyləncəli məlumatlar ötürülür.
“İki ildir uşaq televiziyasında çalışıram. “Yaşıl ev” proqramının aparıcısıyam. Təqdimatı uşaqların sevimlisi Tutu personajı ilə birlikdə edirik. Bu proqramda uşaqlara ümumi evimiz olan planetimizi, təbiəti sevməyi, qorumağı öyrədirik. Bundan başqa tullantıların idarə olunması, onlara ikinci həyat verilməsinin mümkünlüyü haqqında maarifləndirici təqdimatlar hazırlayırıq. Çalışırıq ki, uşaqlar kiçik yaşlarından təbiət, bitki və heyvanlar aləmi haqqında məlumatlı olsunlar”,- deyə aparıcı İntizar Qurbanova söyləyib.
Yeni istehsal edilən cizgi filmlərini Azərbaycan dilində uşaqlara təqdim etmək məqsədilə “ARB Günəş” televiziyasında 2018-ci ildən peşəkar dublyaj studiyası fəaliyyət göstərir. Ötən dövrdə studiyada onlarla cizgi və animasiya filmi Azərbaycan dilinə tərcümə olunaraq, azyaşlı televiziya tamaşaçılarına təqdim edilib.
Dublyaj redaksiyasının redaktoru Elmar Yusifov bildirir ki, uşaqlar üçün filmlərin dublyajına xüsusi həssaslıqla yanaşılır. Mətnlərin tərcüməsi, redaktəsi incəliklə aparılır. Tərcümə zamanı əcnəbi filmlərdəki yan təsirlər nəzərə alınmaqla bərabər, onların uşaq dilinin şirin tərzinə uyğunlaşdırılması əsas meyarlardan biridir.
“Televiziyamızda dublyaj studiyası 7 ildir fəaliyyət göstərir. Burada azyaşlı tamaşaçıların zövqünə uyğun bir-birindən maraqlı cizgi və animasiya filmləri doğma dilimizə tərcümə olunur. Filmlərin dublyajı zamanı uşaqların milli ruhda tərbiyəsi, ədəbi dil normalarına riayət edərək doğma dilimizdə düzgün, sərbəst danışmalarına kömək məqsədilə bütün kriteriyalara diqqət yetirilir. Çalışırıq lüğətimizə yeni əlavə olunan sözlərə, aktyor heyətinin Azərbaycan dilində səlis danışığına xüsusi həssaslıqla yanaşaq”,-deyə Elmar Yusifov söyləyib.
Telekanal təkcə əyləncəli və maarifləndirici deyil, eləcə də sosial xarakterli bir sıra layihələrə imza atıb. “ARB Günəş” hələ Vətən müharibəsində qazanılan şanlı Qələbəmizdən öncə “Onlar uşaqlığını yaşaya bilmir” adı altında cəbhə bölgəsində yaşayan uşaqların həyatını əks etdirən videoçarxlar hazırlayıb.
Televiziya ənənəvi olaraq Bakı Şəhər Dövlət Yol Polisi İdarəsi ilə birgə “Yollarda uşaqların təhlükəsizliyini qoruyaq” adlı aksiya təşkil edir. İstanbulda keçirilən V və VI “Beynəlxalq uşaq mediası konfransı”nda ölkəmizi “ARB Günəş” təmsil edib.
“ARB Günəş” televiziyasının layihələr departamentinin direktoru Çimnaz Şixverdiyeva AZƏRTAC-ın bölgə müxbirinə müsahibəsində bildirib ki, uşaq televiziyasının sosial əhəmiyyəti və məsuliyyəti çox böyükdür: “Çünki uşaq televiziyası tək əyləncə vasitəsi deyil. Eyni zamanda, güclü tərbiyə və təhsil aləti hesab oluna bilər. Biz erkən yaşlardan uşaqlara sosial-emosianal bacarıqların aşılanmasına xüsusi diqqət yetiririk. Hazırladığımız teleproqramlar, doğma dilimizə dublyaj etdiyimiz cizgi və animasiya filmləri ilə, həm də proqramlarda təqdimat edən personajlar vasitəsilə həyata keçirilir. Uşaqlara sosial bacarıqlardan olan ünsiyyət bacarığı, məsuliyyət hissi, həmçinin milli dəyərlərimizi, milli kimliyimizi aşılayırıq”.
Ölkənin ilk və tək uşaq kanalı olan “ARB Günəş” rəqəmsal platformalar və peyk üzərindən yayımlanır. Milli-mənəvi dəyərlərə söykənən, uşaq psixologiyasına müsbət təsir edən yayım həyata keçirən “ARB Günəş” gələcəkdə maarifləndirici verilişlərin və layihələrin sayını daha da artırmağı nəzərdə tutur.
Bölmənin digər xəbərləri
