Naxçıvan dağlarında həyat yenidən canlanıb - Yaylaqlarda zəhmət və bərəkət mövsümü başlayıb VİDEO
Naxçıvan, 24 iyul, AZƏRTAC
Yayın gəlişi ilə Naxçıvanın dağlarında həyat yenidən canlanır. Minilliklərdən gələn yaylaq ənənəsi bu gün də davam edir. Səhər hava işıqlaşan kimi, obaların ocaqlarından tüstü qalxır, sürülər yaşıl örüşlərə üz tutur, çobanların səsi dağlara yayılır.
AZƏRTAC-ın bölgə müxbiri xəbər verir ki, dəniz səviyyəsindən təxminən 2400 metr yüksəklikdə yerləşən Şahbuz rayonunun Qanlıgöl yaylağı bu günlərdə zəhmətin, bolluğun və bərəkətin yaşandığı əsas məkanlardan biridir. Burada yay sadəcə fəsil deyil, heyvandarlar üçün ilin ən məsuliyyətli və məhsuldar vaxtıdır. Təmiz dağ otlaqları, əlverişli iqlim və zəngin təbii şərait Qanlıgölü yay mövsümündə Şərur rayonundan olan heyvandarların ən çox üz tutduğu yaylaqlardan birinə çevirib. Bu ərazilərdə qurulan obalarda aylardır davam edən zəhmətin bəhrəsi olaraq yüksək məhsuldarlıq əldə edilir, ənənəvi yaylaq həyatı isə bütün canlılığı ilə yaşadılır.
Vurğulamaq yerinə düşər ki, muxtar respublikada hazırda 60 mindən çox iribuynuzlu, 400 mindən çox xırdabuynuzlu heyvan var. Hava şəraitinin əlverişli keçməsi ilə iyun ayının ortalarından başlayaraq heyvanlar mərhələli şəkildə yaylaqlara çıxarılıb. Təbii otlaqların zənginliyi və sərin hava həm heyvanların sağlam inkişafına, həm də məhsuldarlığın yüksəlməsinə şərait yaradır.
Fermerlər bildirirlər ki, məhz bu təbii şərait süd məhsullarının keyfiyyətinə birbaşa təsir göstərir. Yaylaq mövsümündə əldə olunan süd, pendir, yağ və digər məhsullar ailələrin illik tələbatının ödənilməsində mühüm rol oynayır.
Qanlıgöl yaylağında artıq 30 ilə yaxındır təsərrüfatla məşğul olan fermer Süleyman Heydərov deyir ki, hər il iyunun ortalarında ailəsi ilə birlikdə yaylağa köçür. Üç aya yaxın burada yaşayan fermer üçün yaylaq həm yaşayış, həm də əsas istehsal məkanıdır. O qeyd edir ki, ailəsinin illik yağ və pendir ehtiyatı məhz bu dövrdə hazırlanır: "Toyuq-cücəmiz də, iribuynuzlu heyvanlarımız da buradadır. Burada hazırladığımız yağ, pendir və digər süd məhsulları ilə ailəmizin ilboyu olan tələbatını ödəyirik. Yeddi nəvəm var, onların hamısı hər il bizimlə birlikdə yaylağa gəlir. Təxminən üç ay burada qalırıq, avqustun sonlarında isə geri qayıdırıq. Yaylaqda yaşamaq bizim üçün həm əlverişli, həm də bərəkətlidir”.
Yaylaq mövsümündə baytarlıq xidmətləri də gücləndirilir. Mütəxəssislər tərəfindən heyvanlar arasında mütəmadi profilaktik müayinələr aparılır, yoluxucu xəstəliklərə qarşı peyvəndləmə tədbirləri həyata keçirilir.
Baytar həkimi Cəlal Kamalovun sözlərinə görə, hazırda Mahmudkənd obasında dabaq xəstəliyinə qarşı profilaktik peyvəndləmə davam etdirilir. Dövlət tərəfindən təmin olunan baytarlıq preparatlarının tətbiqi nəticəsində Şərur rayonu üzrə infeksion xəstəlik qeydə alınmayıb. Təkcə Mahmudkənd obasında yaylaq mövsümündə 8 min 479 baş xırdabuynuzlu heyvan saxlanılır və onların sağlamlığı daim nəzarətdə saxlanılır.
Mütəxəssislər bildirirlər ki, yaylaqlardan səmərəli istifadə heyvandarlığın inkişafında mühüm əhəmiyyət daşıyır. Təbii otlaq sahələri əlavə yem xərclərini azaldır, heyvanların sağlamlığını qoruyur və məhsuldarlığı artırır. Bu da fermerlərin iqtisadi gəlirlərinin yüksəlməsinə, eyni zamanda, əhalinin keyfiyyətli ət və süd məhsulları ilə təmin olunmasına mühüm töhfə verir.
Qanlıgöl yaylağında keçən hər gün zəhmət, səbir və təbiətlə harmoniyanın nümunəsidir. Burada hazırlanan pendir, yağ, yetişdirilən heyvan aylarla çəkilən əməyin bəhrəsidir. Yaylaq mövsümü təkcə ailələrin dolanışığını təmin etmir, həm də Naxçıvanda əsrlər boyu formalaşmış heyvandarlıq ənənəsinin yaşadılmasına xidmət edir. Dağlarda çəkilən bu zəhmət payız və qış aylarının bərəkətinə çevrilərək kənd təsərrüfatının davamlı inkişafına, ərzaq təminatının möhkəmlənməsinə və kənd insanının rifahına mühüm töhfə verir. Bu mənada Qanlıgöl yaylağı hər yay olduğu kimi bu il də zəhmətin bərəkətə çevrildiyi canlı həyat məktəbini xatırladır.
Müxbir - Nail Əsgərov
Bölmənin digər xəbərləri
