MƏDƏNİYYƏT
Baltik dənizinin mirvarisi Latviyada bir neçə gün... VİDEO
Bakı, Anar Rzayev, 11 iyun AZƏRTAC
AZƏRTAC-ın əməkdaşı, ölkəmizdə fəaliyyət göstərən bir sıra şirkətlərin nümayəndələri ilə birgə Latviyada səfərdə olub. O, Latviyanın Azərbaycandakı səfirliyinin və “SPARE” turizm şirkətinin dəstəyi ilə reallaşan səfərlə bağlı təəssüratını oxucularla bölüşür.
Dünyanın gözəl kurort şəhərlərindən biri olan Latviyanın Vidzeme diyarında Riqa körfəzinin sahilində yerləşən Yurmaladan başlayan səfər çərçivəsində bu gözəl diyarın turizm potensialı ilə tanış olmaq imkanı əldə etdik. Şəhər hər il 100 minlərlə turisti özünə cəlb edir. Yurmala öz görkəmi, tarixi abidələri, qonaqpərvər insanları ilə buraya gələn qonaqların zövqünü oxşayır. Şəhərin müalicəvi əhəmiyyət daşıyan təbiəti bura turist axınını daha da artırır. Həmçinin, şəhərdə keçirilən beynəlxalq festivallar, idman yarışları regionun əhəmiyyətindən xəbər verir.
“Laci” çörək zavodu ilə tanışlıq, burada hazırlanan çörəklərdən dadmaq turistlər üçün maraqlı gəzintilərdən biri hesab oluna bilər.
Səfər çərçivəsində Riqada fəaliyyət göstərən ABŞ-ın Tibb üzrə İnformasiya “Klas” şirkəti tərəfindən mükafata layiq görülmüş “Philips İngenia” aparatı ilə təchiz olunan “ARS” Diaqnostika Klinikası ilə tanışlıq da maraq doğurdu. Burada Klinikanın tarixi və fəaliyyəti haqqında ətraflı məlumat verildi. Bildirildi ki, 100-ə yaxın işçisi olan xəstəxanada il ərzində Avropa və dünyanın müxtəlif şəhərlərindən üz tutan xəstələr müalicə alır.
Latviyada bütün müasir avadanlıqlarla təmin olunan “Capital Klinika Riqa” bir çox xəstəliklərin müalicəsində Avropada ikinci yerdə qərarlaşır. Burada, həmçinin tələbələrin elmi işlə məşğul olmaları üçün hər cür şərait yaradılıb.
Bir çox müalicəvi su mənbəyi ilə məşhur olan “Vitality Academy” Lejasraki kurort şəhərində yerləşən sağlamlıq mərkəzidir. Buradakı mineral sular həzm prosesini yaxşılaşdırır, artıq çəkidən əziyyət çəkənlərin arıqlamasına kömək edir.
Latviyanın üçüncü ən böyük şəhəri olan Liepaya bu ölkənin cənub qərbində Baltik dənizi sahilində yerləşir. Region haqqında ilk məlumatlara hələ 1253-cü ildən rast gəlmək olur. Latviyanın əsas port şəhəri hesab olunan bu ərazi sıx meşələrin əhatəsində yerləşir və gözəl təbiəti ilə bura gələnləri heyran edir. Liepaya küləklər şəhəridir. Şəhər, həmçinin öz təmiz havası, minerallarla zəngin müalicəvi suları ilə turistləri özünə cəlb edir. Təsadüfi deyil ki, hər il minlərlə xarici turist bu şəhərə gələrək öz şəfasını burada axtarır. Bir sözlə, bura gözəl mənzərəsi, sakit və əsrarəngiz təbiəti ilə əsl istirahət mərkəzidir.
Növbəti dayanacağımız tarixi ilə bizləri qədim zamanlara, müasirliyi ilə isə bu günümüzə qaytaran paytaxt Riqa oldu. Əhalisi 750 minə yaxın olan Riqada yaşayanların əksəriyyəti latış dilində danışır. Burada küçələri gəzərkən hər addımbaşı möhtəşəm tarixi abidələr, sənət əsərləri, müxtəlif tikililərlə qarşılaşmamaq mümkün deyil. Dauqava çayının üzərində salınmış şəhərin tarixiliyi, möhtəşəm təbiəti, əsrarəngiz mənzərəsi hər il yüz minlərlə turistin bu şəhərə axınını təmin edir.
Şəhəri iki hissəyə ayıran çay üzərindən tikilmiş körpülər onun gözəlliyinə əlavə rəng qatır. Bu körpülərdən ən məşhurları Dzelzceļa və Vansu körpüləri isə möhtəşəmliyi ilə yanaşı, müxtəlif tarixi adətləri ilə də turistlərin marağına səbəb olur.
Riqanın mərkəzində yerləşən Dom və Livu meydanları isə turistlərdə böyük maraq doğuran məkanlardandır. Tarixi binalarla əhatə olunmuş şəhərdə Azadlıq abidəsi Riqanın gözəlliyini daha da artırır. İlin istənilən fəslində bu abidənin önündə xeyli turist görmək mümkündür. Şəhərin mərkəzindəki bütün binalar eyni dövrün arxitekturasını əks etdirir.
Böyük bir tarixi, gözəlliyi ilə yanaşı, Riqa insanı öz gözəl, təmiz küçələri, müasir nəqliyyat infrastrukturu ilə də valeh edir. Latviya, həmçinin özünəməxsus, bir-birindən fərqli və rəngarəng təamlara malik mətbəxi ilə seçilir. Latviya mətbəxinin təamları həm dadlı, həm də doyumludur. Şəhərdə müasirliklə və qədimliyin vəhdəti qovuşur.
Avropanın görməli və gəzməli diyarlarından biri olan Latviyadan xoş təəssüratla ayrılsaq da bu cazibədar diyar heç zaman yaddaşımızdan silinməyəcək.