ABŞ-da azərbaycanlı universitet məzunları və tələbələrin forumu keçiriləcəkdir
Bakı, 14 aprel (AZƏRTAC). ABŞ-da fəaliyyət göstərən Azərbaycan diaspor qruplarından biri - Pax Turcica İnstitutu bu həftə Nyu Yorkda azərbaycanlı universitet məzunları və tələbələri birləşdirən AYNA şəbəkəsinin ilk forumunu keçirəcəkdir.
Diasporla İş üzrə Dövlət Komitəsindən AZƏRTAC-a bildirmişlər ki, forumun əsas məqsədi qrupun fəaliyyət və hədəflərini müzakirə etmək və yerli tələbələrin işini əlaqələndirməkdir.
Pax Turcica İnstitutunun həmtəsisçisi Cavid Hüseynov bir müddət əvvəl qurumun fəaliyyəti ilə bağlı Türk-Amerika Milli Liderlik konfransında çıxış edərək bildirmişdir ki, institut öz fəaliyyətini ABŞ-da türk əsilli amerikalıların birliyi konsepsiyası üzərində qurur.
Cavid Hüseynov “Amerikanın səsi”nə müsahibəsində bildirmişdir ki, Pax Turcica İnstitutu işini əsasən üç istiqamətdə aparır. Bu istiqamətlər özündə icma üzvlərinin təşkilatlandırılması, onların maarifləndirilməsi və mədəniyyətlərarası dialoqun qurulmasını ehtiva edir. Onun bildirdiyinə görə, əvvəlki illərlə müqayisədə hazırda türk təşkilatları arasında əlaqələr daha yaxşı koordinasiya olunur. Cavid Hüseynov, eyni zamanda, ABŞ-dakı türk xalqlarının diasporlarının gənc üzvləri ilə işləməyin vacibliyini vurğulamışdır.
Bölmənin digər xəbərləri
