Ağcabədidə 36 min tondan çox pambıq istehsal edilib VİDEO
Ağcabədi, 23 yanvar, Tahir Ağaməmmədov, AZƏRTAC
Respublikamızın ən iri pambıqçılıq rayonlarından olan Ağcabədidə 2023-cü təsərrüfat ilində 36 min 246,9 ton məhsul istehsal edilib. Hər hektarın məhsuldarlığı 31,54 sentner təşkil edir. Bu göstəricilərlə Ağcabədi rayonu həm pambığın tonuna, həm də hektarın orta məhsuldarlığına görə respublikanın pambıqçılıq rayonları arasında qabaqcıllar sırasındadır. Hazırda 2024-cü təsərrüfat ilinə hazırlaşan ağcabədili “ağ qızıl” ustaları bu il də yüksək məhsuldarlığa nail olmağı qarşıya məqsəd qoyublar.
Ağcabədi Dövlət Aqrar İnkişaf Mərkəzinin bitkiçilik sektorunun müdiri Əlizamin Abdullayev AZƏRTAC-ın bölgə müxbirinə bildirib ki, ötən il “Azərpambıq” MMC, “MKT İstehsalat Kommersiya” MMC, “P-Aqro” MMC ilə müqavilə əsasında 11 min 492,7 hektar sahədə pambıq becərilib. Məhsul yığımı zamanı havanın uzunmüddətli yağışlı keçməsi müəyyən çətinliklər yaratsa da, rayon pambıqçıları yüksək nəticələrə nail olublar. Belə ki, Ağcabədi rayonu respublikada məhsuldarlığa görə üçüncü, məhsulun tonuna görə isə ikinci yerdə qərarlaşıb. Hazırda növbəti 2024-cü təsərrüfat ili üçün müqavilələrin bağlanması davam edir. Bu günə qədər rayonda 10 min hektara yaxın ərazidə pambıq becərilməsi üçün müqavilə bağlanıb. Bununla yanaşı, sahələrdə dondurma şumu aparılır, arat suyu verilir.
Fermerlərin topladıqları məhsul pambıq qəbulu və emalı müəssisələrinə gətirilərək təmizlənir və çeşidlənir. “MKT İstehsalat Kommersiya” MMC-nin Ağcabədi filialının direktor müavini Altay Məmmədov bildirib ki, müqavilə bağlanmış fermerlər pambığın əkilməsi, becərilməsi və yığımı zamanı şirkət tərəfindən texnikalarla, gübrə və pestisidlərlə təmin olunub, aqrotexniki tədbirlər vaxtında həyata keçirilib. Aparılmış yüksək və keyfiyyətli xidmət nəticəsində sahələrdən bol məhsul əldə edilib. 13 min 626 ton kondisiya çəkidə pambıq qəbul olunub ki, bu da hər hektara 35,3 sentner məhsuldarlıq deməkdir. Fermerlərdən qəbul edilən pambıq əvvəlcə tayalara vurulur, sonra emala verilir. Bu zaman pambıq quruducu və təmizləyici qurğulardan keçib emal olunur. Emal olunmuş pambıqdan həm çiyid, həm də əsas məhsul sayılan mahlıc alınır. Çiyiddən əsasən heyvandarlıqda yemçilikdə istifadə olunur. Çiyidin bir hissəsi tərkibindəki yağı emal eləmək üçün Şirvan yağ-piy kombinatına göndərilir. Mahlıc isə dünya bazarında satılır.
“Hazırda 2024-cü il üçün müqavilə bağlanması davam edir. Bu günədək 4 min hektar sahədə pambıq əkilməsi üçün fermerlərlə müqavilə bağlanıb. Bağlanmış müqavilələr üzrə artıq 2500 hektar sahədə şum işləri yekunlaşıb. Builki hədəf fermerlərlə 4300 hektar sahədə müqavilə bağlamaq və daha yüksək məhsuldarlıq əldə etməkdir” - deyə, A.Məmmədov bildirib.
Bölmənin digər xəbərləri
