“Kitabi-Dədə Qorqud” “Koroğlu” kimi qəhrəmanlıq dastanlarımız anime formatında təqdim olunarsa, uşaqlar həm zövqlə izləyə, həm də milli qəhrəmanlarımızı kiçik yaşlarından tanıya bilərlər

Bakı, 14 oktyabr, Gülay Nəzərova, AZƏRTAC

Yapon mədəniyyəti əsrlər boyu öz incəliyi, zənginliyi və fəlsəfəsi ilə dünyanı valeh edib. Çay mərasimləri, samurayların döyüş fəlsəfəsi, kalliqrafiyanın estetikası, origaminin sadə kağızdan yaratdığı möcüzələr… bu incəsənət nümunələri artıq Azərbaycan gənclərinin də həyatında öz yerini tapıb. Lakin onların ən çox maraq göstərdiyi sahələrdən biri Yaponiyada istehsal olunan cizgi filmləri — anime və manqadır. Real həyatı birləşdirən hekayələri və rəngarəng dünyaları ilə anime gənclərin yaradıcılıq potensialını ortaya çıxarır, onlara yeni düşüncə tərzi və yaradıcılıq üfüqləri açır.

Məhz bu marağı birləşdirmək və Azərbaycanda anime sevgisini vahid bir platformaya çevirmək üçün 2015-ci ildə könüllü gənclər tərəfindən “Anifan” Anime Cəmiyyəti yaradılıb. Bu cəmiyyət indiyə kimi 900-dən çox könüllünü ətrafına toplamağı bacarıb. Burada gənclər tərcümə, dublyaj, manqa və altyazı sahələrində birgə çalışaraq, sevimli animeləri Azərbaycan tamaşaçılarına daha əlçatan edir, eyni zamanda, özlərini də peşəkar bacarıqlarda sınayırlar.

“Anifan” Anime Cəmiyyətinin qurucusu Anar Məmmədli AZƏRTAC-a müsahibəsində cəmiyyətin yaranmasından, görülən işlərdən və gələcək planlarından danışıb.

“Anifan”: Azərbaycan gənclərinin Yapon anime dünyasına açılan pəncərəsi

O bildirib ki, cəmiyyət Yaponiyada istehsal olunan cizgi filmlərinin Azərbaycan dilinə tərcümə və dublyajını həyata keçirir. Əsas məqsədlərinin isə yalnız anime izləmək deyil, eyni zamanda gənclərə Yapon mədəniyyətini tanıtmaq, anime və manqa sənayesini ölkəmizdə inkişaf etdirmək olduğunu vurğulayıb.

Onun sözlərinə görə, anime sadəcə bir əyləncə deyil, həm də gənclərin yaradıcılığını oyadan, dünyagörüşünü genişləndirən və yeni dostluqlara yol açan bir mədəniyyət formasıdır. “Anifan” məhz bu dəyərləri təbliğ edərək gənclərin həm əyləncəli, həm də faydalı şəkildə bir araya gəlməsinə şərait yaradır.

Könüllülükdən yaradıcılığa

“Anifan” bu gün dublyaj, tərcümə və yaradıcı layihələrdə fəal iştirak edən gəncləri bir araya gətirən platformaya çevrilib. Bütün bu fəaliyyətlər tamamilə könüllülük və animeyə olan maraq üzərində qurulub. Bizim üçün ən böyük mükafat gənclərin marağı, yaradıcılığı və anime sevgisidir. Onların həvəsi və enerjisi bizim motivasiyamızdır,” – deyə Anar Məmmədli bildirib.

Bu gün “Anifan”a qoşulan gənclər sadəcə izləyici olaraq qalmaqla kifayətlənmir, hər biri bacarığını sınamaq, yeni təcrübə qazanmaq və özünü kəşf etmək fürsəti əldə edir. Bəziləri yazı qabiliyyətini altyazı tərcüməsində sınayır, bəziləri səs tonunu dublyajda yoxlayır, digərləri isə dizayn və təşkilati işlərdə özünü göstərir. Burada hər bir gənc öz hekayəsini yazır, öz yolunu tapır. Ən maraqlısı isə odur ki, bütün bu proseslər qarşılıqlı hörmət və dostluq mühiti üzərində qurulub.

Dublyaj: Hər səsdə bir dünya

Anar Məmmədlinin sözlərinə görə, ilk illərdə cəmiyyət yalnız tərcümə ilə məşğul olub. Lakin daha sonra izləyici və komanda üzvlərinin tələbi ilə dublyaj sahəsinə qədəm qoyulub.

“Hazırda cəmiyyət üzvləri dublyaj, altyazı, manqa və administrativ komandalardan ibarətdir. Hər bir üzv öz səsi ilə animelərə həyat verir, həm yaradıcılığını inkişaf etdirir, həm də komanda ruhunu gücləndirir. Gənclərin marağı bizə göstərir ki, anime yalnız izlənməyə deyil, yaradıcı fəaliyyətə də ilham verir. Hər gün müraciət edən yeni üzvlər və onların ideyaları cəmiyyətimizin canlılığını göstərir,” – deyə o əlavə edib.

O diqqətə çatdırıb ki, səs aktyorları obrazın emosiyasını, xarakterini və ruhunu tamaşaçıya çatdırmaq üçün xüsusi hazırlıqdan keçirlər. Onların məşqləri gənclərə həm aktyorluq bacarıqları qazandırır, həm də özünəinamı artırır. Bəzən bir obraz üçün bir neçə dəfə sınaq aparılır, ən uyğun səs seçilir. Bu proses həm məsuliyyət, həm də böyük həvəs tələb edir. Gənclər üçün isə bu, yalnız bir hobbi yox, gələcək peşə yolunun başlanğıcı da ola bilər.

Populyar janrlar və gənclərin seçimi

“Anifan”ın qurucusu qeyd edib ki, Azərbaycan gəncləri arasında “şounen” və “isekai janrları böyük populyarlıq qazanıb.

“Hazırda “Demon Slayer” (“İblis ovçuları”) və “Jujutsu Kaisen” animeləri xüsusilə izlənilir. Klassiklərdən isə “Naruto”, “One Piece” və “Attack on Titan” daim izləyicilərin favoritləri olaraq qalır. Anime gənclərə dostluq, əzm, birlik və mübarizə kimi dəyərlər ötürür. Biz istəyirik ki, bu dəyərlər real həyatda da öz əksini tapsın,” – deyə Anar Məmmədli vurğulayıb.

Anime janrlarının hər birinin özünəməxsus auditoriyası var. Şounen janrı daha çox macəra və mübarizə ruhu ilə seçilir, bu da xüsusən gənc oğlanların diqqətini çəkir. İsekai janrı isə paralel dünyalar, fantastik səfərlər və qeyri-adi hadisələrlə zəngin olduğu üçün həm oğlanların, həm də qızların sevimlisidir. Digər tərəfdən, romantik, dram və “slice of life” janrları daha çox gündəlik həyatın incəliklərini göstərir, bu da emosional baxımdan gəncləri özünə çəkir. Beləliklə, hər kəs öz ruh halına uyğun janrda bir anime tapır və bu da “Anifan”ın fəaliyyətini daha da rəngarəng edir.

Azərbaycan–Yaponiya əlaqələri və tədbirlər

“Anifan” yalnız ölkədaxili fəaliyyətlə kifayətlənmir. Yaponiyada təhsil almış azərbaycanlı gənclər “Anifan” layihələrinə qoşularaq dil və mədəniyyət biliklərini paylaşır, komandanın beynəlxalq səviyyədə təmsil olunmasına kömək edir.

“Yaponiyada təhsil almış gənclərimiz burada qazandıqları təcrübəni digər üzvlərlə paylaşır, anime və manqanı daha dərindən öyrənmək istəyən gənclərə yol göstərirlər. Belə ki, “Anifan” üzvləri Yaponiyada müxtəlif mədəni tədbirlərdə iştirak edir, Yapon mədəniyyətini gənclərə tanıdır və ölkəmizi beynəlxalq anime festivallarında təmsil edirlər,” – deyə Anar Məmmədli qeyd edib.

“Anifan”ın iştirak etdiyi tədbirlərdə yalnız anime nümayişləri deyil, həm də Yapon çay mərasimləri, kalliqrafiya dərsləri, geyim təqdimatları və mədəniyyət guşələri də yer alır. Bu tədbirlər sayəsində gənclər Yaponiyanın gündəlik həyatına daha yaxından bələd olur, mədəniyyətlərarası dialoq möhkəmlənir. Eyni zamanda, Azərbaycan gənclərinin öz milli dəyərlərini təqdim etməsi də qarşılıqlı maraq doğurur. Bu prosesdə həm iki ölkə arasında dostluq əlaqələri dərinləşir, həm də gənclər özlərini qlobal mədəniyyətin bir parçası kimi hiss edirlər.

Gələcək hədəflər: Azərbaycan animasiyasının yüksəlişi

“Hədəfimiz yalnız xarici animeləri tərcümə etmək deyil. İstəyirik ki, yerli hekayələr, ölkəmizin bölgələri, adət-ənənələri və nemətləri animasiya vasitəsilə dünyaya çıxsın. Azərbaycanın zəngin folkloru, dastanları və rəvayətləri animasiya dili ilə təqdim edildiyi halda həm yerli, həm də beynəlxalq auditoriyada böyük maraq doğura bilər. Kiçik yaşlı uşaqlar bəzən filmlərə maraq göstərməsələr də, animasiya onların diqqətini daha çox çəkir. Əgər “Kitabi-Dədə Qorqud”, “Koroğlu” kimi qəhrəmanlıq dastanlarımız anime formatında təqdim olunarsa, uşaqlar həm zövqlə izləyə, həm də milli qəhrəmanlarımızı kiçik yaşlarından tanıya bilərlər. Bu, həm milli-mənəvi dəyərlərin qorunmasına, həm də yeni nəslin öz köklərinə bağlı böyüməsinə böyük töhfə verər”, - deyə “Anifan”nın qurucusu əlavə edib.