ARDNŞ-in Ekologiya İdarəsinin Dünya Bankının GGFR təşkilatı ilə əməkdaşlığı uğurla davam edir
Bakı, 3 fevral (AZƏRTAC). Azərbaycan Respublikası Dövlət Neft Şirkətinin mətbuat xidmətindən AZƏRTAC-a verilən məlumata görə, şirkət 2008-ci ildən Dünya Bankının Qlobal Qaz Yandırılmalarının Azaldılması üzrə Tərəfdaşlıq Təşkilatı (GGFR) ilə atmosferə atılan səmt qazlarının tutulması istiqamətində əməkdaşlıq edir. Artıq bu sahədə şirkətin Ekologiya İdarəsi və Dünya Bankı tərəfindən bir sıra birgə layihələr həyata keçirilmişdir.
GGFR “ARDNŞ-də və şirkətin iştirak etdiyi layihələrdə səmt qazının azaldılması planı”nda nəzərdə tutulan tədbirlərin səmərəsinin artırılması məqsədi ilə kompleks monitorinqlər həyata keçirmək və instrumental ölçmələr aparmaq üçün Ekologiya İdarəsinə bir sıra avadanlıq da hədiyyə etmişdir. Bu günlərdə qaz sərfini ölçən 3 mobil avadanlıq da idarəyə təhvil verilmişdir. Bu cihazların normal işini təmin etmək məqsədi ilə GGFR əlavə olaraq, təzyiqi kalibrləmə cihazları, kənardan məsafə və temperatur ölçən avadanlıq, həmçinin onların sertifikatlarını da Ekologiya İdarəsinə təqdim etmişdir. Müasirliyi ilə fərqlənən bu cihazlar daha dəqiq ölçmələr aparmağa imkan verir.
Əməkdaşlıq çərçivəsində, həmçinin GGFR-in ekspertləri tərəfindən Ekologiya İdarəsinin işçi qrupuna daxil olan mütəxəssislər üçün nəzəri və praktiki treninqlərin keçirilməsi də nəzərdə tutulur. Ekspertlərin bu ilin mayında Bakıya səfəri gözlənilir.
Bölmənin digər xəbərləri
