AZƏRBAYCAN BÖYÜK POTENSİALA MALİK ÖLKƏDİR
AZƏRTAC xəbər verir ki, sentyabrın 16-da Milli Məclis sədrinin birinci müavini, parlamentin təhlükəsizlik və müdafiə məsələləri daimi komissiyasının sədri Ziyafət Əsgərov ölkəmizdə səfərdə olan Qərbi Avropa İttifaqı Assambleyasının Siyasi Məsələlər Komitəsinin üzvləri ilə görüşmüşdür.
Ziyafət Əsgərov qonaqlara ölkəmizdəki siyasi vəziyyət, parlamentin qanunvericilik bazası, beynəlxalq təşkilatlarla əlaqələri barədə məlumat vermişdir.
Milli Məclis sədrinin birinci müavini demişdir ki, hazırda Azərbaycan öz inkişaf səviyyəsinə görə regionda lider dövlətdir və dünyada öz layiqli yerini tutmuşdur. Ölkəmiz təhlükəsizlik məsələlərinə də xüsusi diqqət yetirir. İndiyədək Azərbaycanın təşəbbüsü ilə həm regionun, həm də Avropanın təhlükəsizliyi üçün mühüm işlər görülmüşdür.
Bildirilmişdir ki, Milli Məclis terrorizmlə bağlı bir sıra mühüm konvensiyaları təsdiq etmişdir. Bakı-Tbilisi-Ceyhan, Bakı-Tbilisi Ərzurum neft və qaz kəmərləri, Bakı-Tbilisi-Qars dəmir yolu xətti təkcə siyasi və iqtisadi cəhətdən deyil, enerji təhlükəsizliyi baxımından da mühüm əhəmiyyət kəsb edir.
Z.Əsgərov təəssüf hissi ilə qeyd etmişdir ki, bütün bunlara baxmayaraq, Azərbaycan özü təcavüzə məruz qalmışdır və terrorizmdən əziyyət çəkir. 1992-ci ildən bəri Ermənistan xüsusi xidmət orqanları Azərbaycan ərazisində 40-dək terror aktı törətmişlər. Azərbaycan torpaqlarının bir hissəsi Ermənistanın işğalı altındadır və 1 milyondan çox insan doğma yurd-yuvalarından didərgin düşmüşdür.
Azərbaycan torpaqlarının işğaldan azad edilməsi ilə bağlı BMT Təhlükəsizlik Şurası 4 qətnamə qəbul etsə də, təcavüzkar Ermənistan bu qətnamələri yerinə yetirmir. Ümid edirik ki, Avropa ölkələri, beynəlxalq təşkilatlar bu məsələyə yenidən baxacaq və Ermənistanı təcavüzkar siyasətindən əl çəkməyə məcbur edəcəklər.
Komitə sədrinin müavini və nümayəndə heyətinin rəhbəri Maykl Hənkok ikinci dəfə Azərbaycanda olmasından məmnunluğunu bildirmiş, ölkəmizdə əldə olunan nailiyyətləri yüksək qiymətləndirmişdir. Qonaq demişdir ki, Azərbaycan həqiqətən də regionda lider dövlətdir və bu fakt Avropanın diqqət mərkəzindədir. Azərbaycanın həm siyasi, həm iqtisadi, həm də təhlükəsizlik məsələləri baxımından böyük potensialı vardır.
Azərbaycanın məcburən münaqişəyə cəlb olunduğunu bildirən Maykl Hənkok demişdir ki, Ermənistan BMT TŞ-nin qətnamələrini yerinə yetirməyən iki dövlətdən biridir. Ümid edirik ki, münaqişə sülh yolu ilə həllini tapacaq və Azərbaycan öz enerji ehtiyatlarını təhlükəsiz şəraitdə dünya bazarlarına nəql edəcəkdir.
Daha sonra görüşdə oktyabrın 15-də Azərbaycanda keçiriləcək prezident seçkiləri, Cənubi Qafqazda vəziyyət, alternativ enerji mənbələrindən təhlükəsiz istifadə və digər məsələlər ətrafında fikir mübadiləsi aparılmışdır.
Bölmənin digər xəbərləri
