Azərbaycan diasporundan erməni lobbisinin Ankarada konfrans keçirməsinə etiraz
Ankara, 28 noyabr, AZƏRTAC
Türkiyədəki erməni lobbisinin bir neçə gün əvvəl Ankarada “Möhürlü qapı: Türkiyə-Ermənistan sərhədinin gələcəyi” mövzusunda konfrans keçirməsi bu ölkədəki Azərbaycan diasporunun etirazına səbəb olub.
Türkiyə Azərbaycan Həmrəylik və Mədəniyyət Dərnəyinin yaydığı bəyanatda bu konfransın keçirilməsi pislənilir.
Bəyanatda Ermənistan silahlı qüvvələrinin Azərbaycana qarşı hərbi təcavüzü nəticəsində 1993-cü ildən bəri Dağlıq Qarabağın və ətraf yeddi rayonun işğal altında qalması, ermənilərin Xocalıda soyqırımı törətməsi qeyd edilir. Həmçinin ermənilərin Türkiyə torpaqlarını işğal etmək xəyalı ilə yaşadıqları, prezident Serj Sarkisyanın bir erməni şagirdə söylədiyi “Qarabağı biz aldıq, Ağrını sizə qoyduq” sözləri xatırladılır və bütün bunların ermənilərin niyyətini acıq şəkildə bəlli etdiyi vurğulanır.
Bəyanatda ermənilərin türklərə qarşı dəfələrlə soyqırımı və deportasiya aktı həyata keçirdikləri, onların türk diplomatlarını şəhid edib öz əməlləri ilə qürur duyduqları, bütün bunlardan sonra isə sülhdən, sərhədlərin açılmasından danışmağın yolverilməz olduğu bildirilir. Ermənilərin Qarabağda, Xocalıda və Anadoluda törətdikləri vəhşiliklərə görə cavab verməli olduqları, türklərin heç zaman hər hansı millətə qarşı soyqırımı aktı həyata keçirmədiyi, əksinə 1915-ci ildə türklərin bir neçə cəbhədə döyüşməsindən istifadə edən ermənilərin onlara qarşı kütləvi qətllər törətməsi də diqqətə çatdırılır.
Bəyanatda deyilir: “Təəssüf ki, Ermənistanın etdiyi əməllərin cəzasını başda erməni xalqı olmaqla bölgənin digər xalqları çəkməli olur. Ermənilər öz səhvlərini etiraf edib geri çəkildiyi zaman bölgədə sülh və sabitlik bərqərar olacaq. Əks halda sərhədlərin açılması müzakirə mövzusu ola bilməz”.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
