AZƏRBAYCAN PREZİDENTİ İLHAM ƏLİYEVİN ÇIXIŞI
-Çox sağ olun. Mən də demək istəyirəm ki, Naftalanın inkişafına bundan sonra da diqqət göstəriləcək, vəsait ayrılacaqdır. Mənim buraya gəlməyimin ikinci səbəbi ondan ibarətdir ki, sizinlə görüşüm. Mən Prezident seçiləndən sonra ilk dəfədir ki, Naftalandayam. İstəyirdim, sizinlə görüşüm, öz fikirlərimi sizə bildirim. Digər tərəfdən, biz gərək Naftalanın keçmiş şöhrətini özünə qaytaraq. Çünki keçmiş Sovet İttifaqında, - siz də dediniz, - müxtəlif yerlərdə kurortlar var idi. Kurortlar daha çox müalicəvi su çıxan yerlərdə təşkil olunurdu. Naftalanın özəlliyi, xüsusiyyəti ondadır ki, yeganə kurort idi ki, burada insanlar müalicəvi neftlə öz sağlamlıqlarını bərpa edirdilər. Bu nadirlik bu gün də qalır. Yəni dünyada başqa belə bir yer yoxdur ki, insanlara buna bənzər şəfa gətirsin. Ona görə biz Naftalanı müasir kurort şəhərinə çevirməliyik ki, ilk növbədə, Azərbaycan vətəndaşları bu kurortdan səmərəli istifadə etsinlər. Eyni zamanda, xarici ölkələrdən gəlsinlər, Azərbaycanla tanış olsunlar. Beləliklə, Azərbaycanın turizm infrastrukturu da möhkəmlənəcəkdir.
Burada yeni sanatoriyalar tikilməlidir. Mən bildiyimə görə, artıq bəzi yerlərdə bərpa işləri gedir. Xarici investorlar da, daxili investorlar da maraq göstərirlər. Dövlət isə öz tərəfindən şəhərin infrastrukturuna, abadlıq, quruculuq işlərinə, yollara vəsait qoymalıdır ki, burada turizmin, kurort sahəsinin inkişafı üçün lazımi şərait yaradılsın.
Naftalanın yerləşdiyi yer də çox gözəldir, coğrafiyası, təbiəti, havası gözəldir. Gözəl ağaclar əkilibdir. Siz qeyd etdiniz ki, 1982-ci ildə ulu öndər şəhərin inkişafı ilə bağlı qərar vermişdi və qısa müddət ərzində sanatoriyalar yaradıldı. Amma ondan sonrakı illərdə, Sovet İttifaqı dağılandan sonra, Azərbaycanda vəziyyət gərginləşəndən sonra, əlbəttə, sanatoriyalar da tələblərə cavab vermirdi. Onların bir hissəsində qaçqınlar məskunlaşıbdır. Bu da təbiidir. Çünki müharibədən əziyyət çəkən soydaşlarımız Azərbaycanda məskunlaşmalı idilər. Ancaq indi bilirsiniz ki, qaçqınların problemlərinin həlli və məşğulluğunun artırılması ilə bağlı sərəncamlar imzalanmışdır. Yəqin ki, biz onları daha münasib yerlərə köçürəcəyik ki, burada həm köhnə sanatoriyalar bərpa olunsun, həm də yeni sanatoriyalar, mehmanxanalar, turizm yerləri tikilsin. Əlbəttə, bu, şəhərin inkişafına təkan verəcək, insanların həyat səviyyəsini yaxşılaşdıracaq, xidmət sahəsində işləyənlərin sayı artacaq və burada işlər daha da yaxşı gedəcəkdir.
O ki qaldı Azərbaycanın ümumi inkişafına, siz qeyd etdiniz, biz çox yüksək zirvəyə çatmışıq. Mən bu gün səhər Gəncədə iki böyük, nəhəng sənaye kompleksinin təməlini qoydum. O müəssisələrə bir milyard dollardan çox vəsait qoyulacaq və iki-üç il ərzində böyük sənaye müəssisələri yaradılacaqdır. Bu, həm iqtisadi inkişaf deməkdir, işsizliyin aradan qaldırılması, yoxsulluğun aradan qaldırılması deməkdir və həm də Azərbaycanın hərtərəfli inkişafı deməkdir. İndi bizim iqtisadi inkişafımız elədir ki, istənilən məsələni həll edə bilərik. Biz xarici kreditlərə də o qədər ehtiyac duymuruq. Bölgələrin abadlaşmasına ayrılan vəsait də ildən-ilə artacaqdır. Bir müddət bundan əvvəl Naftalanın inkişafına da vəsait ayrılmışdır. Ancaq hesab edirəm ki, biz bu məsələyə yenidən baxmalıyıq, əlavə vəsait ayrılmalıdır və ondan səmərəli istifadə etməliyik. Burada həm quruculuq-abadlıq işləri, binaların təmiri, yeni infrastrukturun yaradılması, həm də insanların həyat səviyyəsinin yaxşılaşması üçün bütün işlər görülməlidir. Hər yerdə olduğu kimi, şəhər əhalisi də yaxşı yaşamalıdır. Əsas məqsəd ondan ibarətdir ki, insanlar daha da yaxşı yaşasınlar.
Azərbaycanda sosial və iqtisadi sahələrdə gedən işlər bir-birini tamamlayır. Bəzi hallarda bazar iqtisadiyyatı şəraitində yaşayan ölkələrdə sosial məsələlərə o qədər də böyük diqqət göstərilmir. Çünki bazar iqtisadiyyatı prinsipləri bəzən insanlar üçün çox sərt olur. Ancaq biz həm sosial siyasət aparırıq, həm də islahatlar aparırıq. Bəzən iqtisadi islahatlar insanların həyat səviyyəsinə mənfi təsir göstərir. Biz bunun qarşısını almalıyıq. Maaşlar artırılır, pensiyalar keçən il artırılıb və bu il yenidən artırılacaqdır. Əlbəttə, işlə təmin olunmaq üçün şərait olmalıdır və biz bunu yaradırıq.
Sosial məsələlərin həlli üçün iqtisadi inkişaf, sənaye potensialının inkişafı vacibdir və bu, ölkəmizi gücləndirir. Bu gün biz bölgədə aparıcı ölkəyik. Buna biz özümüz nail olmuşuq. Biz öz gücümüzə, Azərbaycan xalqının gücünə arxalanırıq. Bütün siyasət, yəni xarici, daxili, iqtisadi, sosial siyasət - bunların hamısı bir istiqamətə yönəlibdir ki, ölkə güclənsin, insanlar daha da yaxşı, təhlükəsizlik, sabitlik şəraitində yaşasınlar. İndi hamımız görürük ki, Ermənistanda vəziyyət çox gərgindir. Nəyin nəticəsində?! Düşünülməmiş siyasətin, işğalçı siyasətin, özünütəcrid vəziyyətinə salan siyasətçilərin fəaliyyəti nəticəsində ölkə belə çətin vəziyyətə düşübdür. İnkişaf olmayan yerdə sabitlik ola bilməz. Sabitlik olmayan yerdə inkişaf ola bilməz. Azərbaycan həm inkişaf edir, həm vəziyyət sabitdir, həm də xalqla iqtidar arasında birlik var. Bizim bütün səylərimiz bir məqsədə qulluq edir: ölkəmiz güclənsin, Azərbaycan torpaqları işğalçılardan azad olunsun, soydaşlarımız öz doğma torpaqlarına qayıtsınlar. Biz öz gücümüzü artırmaqla o günü yaxınlaşdırırıq.
Naftalan həm coğrafi baxımdan strateji nöqtədir, həm də iqtisadi baxımdan çox mühüm bir şəhərdir. Burada müasir səviyyənin təşkil olunması mütləq və mütləq olmalıdır. Mən Bakıya qayıdandan sonra şəhərin inkişafına dair lazımi qərarları verəcəyəm və siz onların nəticələrini görəcəksiniz.
Çox sağ olun.
X X X
Görüşdən sonra Prezident İlham Əliyev Naftalan ziyalıları ilə xatirə şəkli çəkdirdi.
Bölmənin digər xəbərləri
