Azərbaycan səfiri etimadnaməsini Efiopiyanın Prezidentinə təqdim edib
Bakı, 24 dekabr, AZƏRTAC
Azərbaycanın Efiopiyadakı səfiri Elman Abdullayev etimadnaməsini bu ölkənin Prezidenti Mulatu Teşomeyə təqdim edib.
Xarici İşlər Nazirliyinin mətbuat xidmətindən AZƏRTAC-a verilən məlumata görə, Elman Abdullayev Azərbaycan Prezidenti İlham Əliyevin salamlarını və xoş arzularını Prezident Mulatu Teşomeyə çatdırıb.
Səfir Azərbaycanın Afrika qitəsinin mühüm ölkələrindən biri olan Efiopiya ilə münasibətlərin inkişafında, xüsusilə iqtisadiyyat, humanitar, mədəniyyət və təhsil sahələrində əməkdaşlığın genişləndirilməsində maraqlı olduğunu qeyd edib. E.Abdullayev iki ölkə arasında münasibətlərin yeni müstəviyə qaldırılması üçün böyük potensialın mövcud olduğunu bildirib.
Prezident Mulatu Teşome onun da salamlarının və ehtiramının Azərbaycan Prezidenti İlham Əliyevə çatdırılmasını xahiş edib. Efiopiya Prezidenti ölkəsinin Azərbaycan ilə münasibətlərin inkişafına böyük əhəmiyyət verdiyini, Azərbaycanın sürətli inkişafının ona dərin təəssürat bəxş etdiyini söyləyib.
Prezident yeni səfirə fəaliyyətində uğurlar arzulayıb.
Görüşdə ölkələrimiz arasında müxtəlif sahələrdə perspektiv əməkdaşlıq imkanları da müzakirə olunub.
Bölmənin digər xəbərləri
