Azərbaycan Turizm Assosiasiyası ilə Rusiyanın Tümen vilayəti arasında əməkdaşlıq haqqında müqavilə imzalanıb
Moskva, 26 mart, AZƏRTAC
Azərbaycan Turizm Assosiasiyası ilə Rusiyanın Tümen vilayəti arasında yaxın üç ildə turizm sahəsində ikitərəfli münasibətlərin inkişaf etdirilməsi haqqında memorandum imzalanıb. Razılıq Moskvada keçirimiş “Səyahətlər və turizm” 23-cü beynəlxalq turizm sərgisi çərçivəsində əldə edilib.
Memoranduma əsasən, tərəflər turizm sahəsində təcrübə mübadiləsi aparacaq, birgə konfranslar, seminarlar, sərgilər təşkil edəcəklər. Həmçinin qarşılıqlı surətdə faydalı turizm fəaliyyətinin inkişafına yönəldilmiş layihələr işləyib hazırlayacaq, turizm şirkətləri arasında əməkdaşlıq münasibətlərinin qurulmasına kömək edəcəklər.
Tümen vilayətinin “Tümenskaya liniya” informasiya agentliyinin məlumatına görə, Rusiyanın bu vilayəti Azərbaycan ilə bir çox sahələrdə 1999-cu ildən səmərəli tərəfdaşlıq münasibətləri qurub. Rusiya Federal Gömrük Xidmətinin məlumatına əsasən, 2015-ci ildə Azərbaycan ilə Tümen vilayəti arasında xarici əmtəə dövriyyəsi 5 milyon 156,43 min dollar təşkil edib. Bu məbləğin 4 milyon 761,08 min dolları idxal, 395,35 min dolları ixracın payına düşüb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
